ССМ: За четиричлено семејство во јуни потребни се најмалку 68.654 денари за основни трошоци

На едно четиричлено семејство во Македонија во јуни му се потребни најмалку 68.654 денари за да ги покрие основните месечни трошоци, покажуваат најновите податоци за Синдикалната минимална кошница кои денеска ги објави Сојузот на синдикати на Македонија (ССМ).

Доколку семејството нема сопствен дом и живее во изнајмен стан од 60 квадратни метри, финансискиот товар драстично се зголемува, при што сумата достигнува високи 84.024 денари.

Во споредба со претходниот месец, кога минималната кошница изнесуваше 68.742 денари, забележано е минимално намалување од само 88 денари.

На што најмногу се трошат парите?

Убедливо најголема ставка е храната и пијалаците, за кои се потребни 25.120 денари, што претставува дури 36,6% од вкупниот семеен буџет.

Втора по големина ставка во јуни е образованието, каде за едукативни потреби на семејството се издвојуваат 7.192 денари (10,5%).

За облека и обувки се пресметани 6.511 денари (9,5%), додека основните режиски трошоци (вода, струја, греење) за оние кои имаат сопствен стан изнесуваат 6.379 денари (9,3%).

Понатаму, за рекреација и култура во јуни се наменети 5.592 денари (8,1%), за транспорт се потребни 5.089 денари (7,4%), а за исхрана во ресторани и хотелски услуги се предвидени 4.131 денар (6,0%).

На дното на листата се трошоците за комуникации со 3.677 денари (5,4%), лична хигиена и одржување на домот со 2.667 денари (3,9%), здравје со 1.196 денари (1,7%) и останати стоки и услуги со 1.100 денари (1,6%).

Текстот ССМ: За четиричлено семејство во јуни потребни се најмалку 68.654 денари за основни трошоци е превземен од МАКФАКС.