(Видео) Николоски: Кандидатот на СДСМ за Аеродром нанел тешки повреди на човек кој бил на раб да загине

Потпретседателот на ВМРО-ДПМНЕ, Александар Николоски при денешната посета на општина Аеродром, за кандидатот од СДСМ за градоначалник на оваа скопска општина, Александар Филиповски, рече дека е осудуван за нанесување тешки телесни повреди на лице кое било на раб да го загуби животот.

„Кандидатот на СДСМ е лице кое што е осудувано за напад со тешки физички повреди, имено истиот има пресуда и од Основен и од Апелационен суд за напад врз друго лице за што е осуден на две години условна казна со една година ефективна казна, заради тоа што нанел тешки телесни повреди на друго лице. Од она што ние го имаме како сознание се работи за еден тежок инцидент во кој што другото лице било на раб да го загуби и животот. Таков човек кандидира СДСМ и Зоран Заев тука во Аеродром“ истакна Николоски.

Тој порача дека нивниот кандидат, Тимчо Муцунски е исклучително квалитетно решение кое ќе ги промени работите во општина Аеродром, затоа што, како што кажа, од СДСМ веќе признале дека општина Аеродром не ја воделе добро со самото тоа што решиле актуелниот градоначалник да не го кандидираат за втор мандат.