(Видео) Советникот Кузмановски со предлог до Советот во Битола да донесе препорака до Владата за набавка на 20 електрични еколошки автобуси

Советот на Општина Битола не ја прифати иницијативата на советникот и претседател на ОО ЛДП Битола, Димитар Кузмановски, кој поднесе предлог до советниците за набавка на 20 нови електрични и еколошки автобуси кои ќе бидат наменети за градскиот јавен превоз. Според Кузмановски, општинската администрација самата признала дека има тотално нефункционален јавен превоз.

Во предлогот Кузмановски побара Советот да му препорача на градоначалникот на Општина Битола да упати барање до Владата за набавка на 20 електрични автобуси за јавен превоз. Набавените електрични автобуси ќе бидат во сопственост на новото јавно претпријатие за јавен превоз и ќе се користат за воспоставување на организиран, редовен и еколошки јавен превоз на територија на општината, извести ЛДП.

„Како образложение – ова барање се поднесува со цел да се надмине проблемот со нефункционирањето на јавниот превоз, нередовноста на линиите и немање на јавен превоз во недела и државни празници, нешто што го констатиравме на самата комисија. Со набавката на електрични автобуси се обезбедува редовен, еколошки и сигурен јавен превоз за граѓаните на Општина Битола и како заклучок, Советот на Општина Битола го задолжува градоначалникот на следната седница, која ќе се одржи во јануари, да го информира Советот за упатеното барање и преземени активности кон Владата на Р. Македонија“, вели Кузмановски.

Тој додаде дека доколку битолчани сакаат да имаат јавен превоз, мора да се набават автобуси, како што треба и доликува на Битола, а бидејќи во буџетот никаде не е наведено дека општината ќе почне да инвестира во јавното претпријатие за превоз на патници, не им останува ништо, туку да побараат помош од владата.

„Го слушавме премиерот во изминатиот период, како најавува околу 100 електрични автобуси за Скопје. Кога може во Скопје да се набават 100 електрични автобуси, зашто да не може Битола да добие барем 20-тина и еднаш засекогаш да го решиме овој проблем со јавниот превоз“, вели Кузмановски.

Кузмановски посочи и дека битолчани постојано се жалат на моменталниот јавен превоз, кој речиси и да го нема, на башибозукот на превозниците, кои не се соодветно санкционирани од страна на општината.

„Да потсетам дека згора на сѐ тоа, ние исплативме по 7 денари за километар субвенции како град на овие превозници, а не знаеме дали тие воопшто возат, што значи дека тука веќе има и материјал за предистражни органи, за тоа како ние тоа исплативме, а општината констатира дека тие не возат“, завршува Кузмановски.

Текстот (Видео) Советникот Кузмановски со предлог до Советот во Битола да донесе препорака до Владата за набавка на 20 електрични еколошки автобуси е превземен од МАКФАКС.