(Видео) 40-годишнината од формирањето на „тигрите“ одбележана со нов назив и нови амблеми

Специјалната aнтитерористичка eдиница при МВР, позната како „Тигар“, денеска одбележа 40 години од своето постоење.

„Оваа единицата е синоним за професионалност, за максимална храброст и подготвена да се спротивстави на каков и да е предизвик со кој е доведена во прашање безбедноста на земјата и граѓаните“, рече премиерот, Зоран Заев, во своето обраќање по тој повод.

„Секој припадник на оваа единица е апсолутно свесен какви ознаки носи на својата униформа и дека таа чест и привилегија од секој нејзин припадник бара крајно високи и специфични вештини и етика. Убеден сум дека реорганизираната и модернизирана Специјална антитерористичка единица – Тигар ќе го продолжи трасираниот четириесетгодишен пат на високо мотивирана, врвно организирана и подготвена служба, која заедно со сите останати сегменти на нашиот безбедносен систем е гарант за мирот и безбедноста на граѓаните и за заштитата на уставниот поредок на државата“, рече Заев.

Министерот за внатрешни работи Оливер Спасовски во обраќањето потенцира дека денешното одбележување на 13 март има своја исклучителна посебеност од две причини.

„Првата е дека денес одбележуваме еден многу значаен јубилеј, а тоа е четири децениско постоење на единицата и втората, фактот дека како резултат на нашите заеднички реформски напори и стандардизирањето согласно критериумите на НАТО и ЕУ, ја промовираме единицата во Специјална антитерористичка единица – Тигар, назив што сосема соодветствува со новата структурно-концепциска надградба на оваа полициска организациона единица“, рече Спасовски, додавајќи дека специјалната единица сега по ништо не заостанува од истородните елитни полициски единици во Европа.

Од денес наместо Единица за специјални задачи (ЕЗС) „Тигар“, се преименува во Специјална антитерористичка единица (САЕ) „Тигар“.

Командантот на единицата, Митко Даневски рече дека од формирањето до денес низ редовите на единицата поминале 700 припадници на македонската полиција, а посебно место во историјата на единицата имаат полициските службеници кои ги дадоа своите животи извршувајќи ја својата должност, на првата борбена линија.

„Специјалната антитерористичка единица ‘Тигар’ во изминатите 40 години беше и продолжува да биде чувар на уставниот поредок на државата, во борбата против тероризмот и организираниот криминал, гарантирајќи го мирот, слободата и безбедноста на сите граѓани на нашата земја“, рече Даневски.