ВМРО-ДПМНЕ за „Ласкарци“ и Јакимовски: „Правосудството повторно одработи за СДС и ДУИ“

ВМРО-ДПМНЕ повторно упати остри обвинувања кон правосудството по неодамнешните одлуки на Врховниот суд за случајот „Ласкарци“ и за градоначалникот на Карпош, Стевчо Јакимовски, тврдејќи дека во судството и натаму функционираат структури блиски до СДСМ и ДУИ.

Портпаролот на партијата, Валентин Манасиевски, на денешната прес-конференција директно ги посочи судиите Африм Фидани, Џемаили Саити и Сафет Кадрии.

„Остатоците на СДС и ДУИ во правосудството повторно одработија во нивна корист, односно ги заштитија криминалците“, рече Манасиевски.

Во однос на автобуската несреќа кај Ласкарци, во која во февруари 2019 година загинаа 16 лица, Манасиевски тврдеше дека Врховниот суд со укинувањето на пресудата ги „ослободил виновниците“.

Сепак, со одлуката на Врховниот суд не е донесена ослободителна пресуда. Судот го уважи барањето за вонредно преиспитување на правосилната пресуда, ја укина одлуката на Апелациониот суд и предметот го врати на повторно постапување. Тоа значи дека постапката за „Ласкарци“ продолжува и дека со одлуката на Врховниот суд не е утврдено дека обвинетите се невини.

Манасиевски ја поврза оваа одлука и со случајот на Стевчо Јакимовски, за кого рече дека Врховниот суд го „пуштил на слобода“ откако бил правосилно осуден.

И во овој случај, Врховниот суд ги укина претходните пресуди и предметот го врати на повторно судење, што значи дека не станува збор за ослободителна пресуда со која предметот е правосилно завршен.

„Само во македонското судство и обвинителство може за случај во кој гинат 16 луѓе да нема ниту еден одговорен. Истото е случај и со модуларната болница каде загинаа 14 лица, а нема ниту еден виновник според правосудните органи“, рече Манасиевски.

Портпаролот на ВМРО-ДПМНЕ јавно праша и дали судиите што одлучувале во овие предмети се блиски до структури на ДУИ, без притоа да презентира докази за таквата поврзаност.

„Политичките инсталации на СДС и ДУИ градени со години не исчезнуваат преку ноќ. Тие и понатаму се обидуваат да ги користат последните бастиони во институциите за да го заштитат системот што самите го создадоа“, рече Манасиевски.

Од ВМРО-ДПМНЕ оценуваат дека ваквите одлуки дополнително ја нарушуваат довербата на граѓаните во правосудниот систем и бараат одговорност.

„На Македонија не ѝ треба судство и обвинителство кое ќе биде бастион на СДС и ДУИ. Ѝ треба судство и обвинителство кое ќе биде бастион на правдата. Нема да молчиме и нема да се откажеме. Правда и одговорност мора да има“, порача Манасиевски.

Текстот ВМРО-ДПМНЕ за „Ласкарци“ и Јакимовски: „Правосудството повторно одработи за СДС и ДУИ“ е превземен од МАКФАКС.