Мицкоски: Ако не успееме да формираме нова Влада, втората опција се брзи предвремени избори

Лидерот на ВМРО-ДПМНЕ, Христијан Мицкоски смета дека новото парламентарно мнозинство значи дека паѓа Владата на СДСМ и Зоран Заев. Според него, тоа ќе значи дека во наредниот период ќе се обиде да формира нова Влада и додаде: „тоа ќе се случи само ако сум сигурен дека ќе биде Влада на сериозен кредибилитет и силни институции кои ќе гарантираат стабилност. Доколку не се постигне оваа цел кон која се стремам и не обезбедам полна ефикасност на Владата, борба против корупцијата и криминалот, тогаш, тоа што ни преостанува како единствена опција се брзи предвремени парламентарни избори за народот да одлучи за новата иднина“.

„Очекувам ова мнозинство да биде зголемено. Велеа дека е невозможно, но покажавме дека заедно можеме да направиме повеќе. Со сите разлики, но со една цел, напредок на народот и Македонија, да ја извадиме државата од криза и да донесеме нова иднина, заеднички и сложно. Народот на Македонија со сите разлики, има заедничка мака, делиме исти проблеми“, кажа Мицкоски.

Тој посочи дека е време за промени и надминување на разликите.

„Овие избори значеа и неминовно референдумско изјаснување против оваа Влада. Луѓето со право сметаат дека Зоран Заев мора да падне бидејќи ги изневери очекувањата на народот. Владее со пазарења. Си поигруваше со достоинството на државата, додека народот тоне во сиромаштија, хаварија и афери на дневна основа. Останувањето на оваа Влада по таков изборен дебакл, без кредибилитет и мотив за работа, ќе значи продлабочување на политичката криза. Со економската криза, енергетскиот шок, ковид тенденциите кои се загрижувачки, ќе ја клекнат земјава на колена. Имаше и такви кои ми велеа дека најдобро за мене и ВМРО-ДПМНЕ е да не прави ништо, а власта на Заев ќе заглавува во поголеми проблеми. Има нешто што се вика одговорност спрема државата и народот. Ваквите тешки времиња се значаен предизвик во кој влегува ВМРО-ДПМНЕ. Се ставаме на страна на народот. Затоа по изборите, во името на сите очекувања на народот, јас тргнав во создавање на ново мнозинство како единствен излез за пад на оваа Влада. Ново парламентарно мнозинство значи заеднички блок со коалицијата на ВМРО-ДПМНЕ, Алијанса на Албанците и Алтернатива, Беса и Левица. Ова е коалиција против криминалот“, рече Мицкоски.