Нова лага и манипулација на Мицкоски за БДП, со инфлација од 5,7% животниот стандард на граѓаните се намалува, велат од СДСМ

Според опозициската СДСМ, премиерот Христијан Мицкоски прави уште една манипулација и лага во економијата.

„Зборува за раст на БДП во првиот квартал за 3,1%, но истовремено инфлацијата достигна 5,7%.

Тоа во реалноста значи дека цените растат побрзо од економијата и дека граѓаните реално осиромашуваат.

Кога со истата плата можете да купите помалку храна, помалку месо, помалку овошје и помалку основни производи, тогаш нема економски успех, туку намален животен стандард.

Владата слави проценти, а граѓаните бројат се помалку денари во својот џеб, едвај врзвуваат крај со крај“.

Храната и безалкохолните пијалаци, нагласуваат од оваа партија, се поскапени за околу 8%, инфлацијата во Македонија е речиси двојно повисока од онаа во еврозоната каде е околу 3%, странските инвестиции бележат пад за 60%, а јавниот долг со новите задолжувања се приближува до 11,1 милијарди евра.

Според нив, раст кој се храни од инфлација не е развој. Раст кој се потпира на долгови не е успех.

Вистински напредок, како што додаваат, има само кога граѓаните можат да купат повеќе со својата плата, кога животот станува подостоинствен и кога семејствата чувствуваат подобар стандард.

„Лагите на Мицкоски се распаѓаат кога граѓаните ќе ги видат своите празни паричници, празни фрижидери и кога на каса во маркет не можат да ја наполнат кошицата.

Затоа ни е потребна ЕУ, за подобар животен стандард на граѓаните. Бидејќи не е исто кога си изолиран и кога си дел од група држави што спроведуваат заеднички економски политики и мерки, со кои им помагаат на сите граѓани на Европа“.

Текстот Нова лага и манипулација на Мицкоски за БДП, со инфлација од 5,7% животниот стандард на граѓаните се намалува, велат од СДСМ е превземен од МАКФАКС.