Премиерот Заев ги охрабри македонските бизнисмени да учествуваат на тендери на НАТО

Премиерот Зоран Заев и министерот за земјоделство, Арјанит Хоџа, одржаа работна средба со извршниот директор на Бизнис клубот на Евро-Атлантскиот Совет, Светозар Јаневски, претседателот Исмет Рамадани, како и со стопанственици членови на раководството на Бизнис клубот.

Како што информираат од владината прес-служба, на состанокот се дискутирало за подобрување на деловниот амбиент и економската активност на компаниите, како и за проекти кои се очекува да ги зголемат вработувањата во земјава и да се активираат селата и руралните средини.

Премиерот Заев искажал поддршка за идеите кои доаѓаат од деловната заедница, која треба да го придвижи економскиот раст во земјата и ги охрабрил стопанствениците да продолжат со плановите за инвестициски циклуси и вложување во човечкиот капитал со цел заедничко прилагодување на новите и современи економски текови и за успешно надминување на предизвиците од глобалната пандемија.

Дополнително се разговарало и за „NATO procurement process” и можностите македонските компании да пристапат на овој процес за да бидат дел од голем комплекс на набавки.

Заев и Хоџа истакнале дека приватниот сектор има важна улога во создавањето работни места и приходи за граѓаните, дополнително и преку постојаните иновации што носат нови производи и услуги на пазарот, а со тоа и додадена вредност.

Дополнително било подвлечено дека со влезот во НАТО и со примената на стандардите на ЕУ, кои треба да станат домашни стандарди, се обезбедува сигурност на инвестициите преку механизми за владеење на правото, за намалување на сивата економија, на парафискалните давачки и со борбата против корупцијата.