(Видео) После 40 години Кавадарци добива нова градинка

Министерката за труд и социјална политика, Јагода Шахпаска денеска присуствуваше на официјалното отворање на новата градинка „Сонце“ во Кавадарци.

Градинката има услови да згрижи 142 деца од предучилишна возраст, распоредени во седум групи.

„Децата од Кавадарци за првпат после 40 години, добиваат целосно нова детска градинка којашто целосно е финансирана од Министерството за труд и социјална политика, во склоп на Проектот за подобрување на социјалните услуги, поддржан од Светска банка, во вредност од 57,4 милиони денари“, нагласи министерката.

Шахпаска додаде дека градинката е изградена согласно најсовремените стандарди за енергетска ефикасност и ќе користи и обновливи извори на енергија преку системот на сончеви колектори.

Според градоначалникот на Општина Кавадарци, Митко Јанчев, овој проект е од големо значење за општината бидејќи е реализиран според високите стандарди за ран детски развој и е една од најубавите и најсовремените градинки во земјата.

„Покрај големиот бенефит за дечињата, градинката ќе овозможи нови вработувања на воспитувачи и негуватели, односно цел персонал кој ќе се грижи за дечињата и за нивниот развој“, истакна Јанчев.

Градинката во Кавадарци е една од 10-те целосно нови градинки чија изградба е финансирана од проектот за подобрување на социјалните услуги. Како дел од проектот во тек е реконструкција, надградба и адаптација на уште 3 градинки, а 4 се веќе целосно завршени.

За 16 месеци, ова е 16. градинка отворена од страна на Министерството за труд и социјална политика со поддршка на Владата и во соработка со општините.