Герасимовски: Македонската музика повторно на сцената во Центар, пријави се за „Нешто што ќе остане“

Музичкиот хепенинг „Нешто што ќе остане“ и оваа година останува заштитен знак на културната сцена во Центар.

За реализација на овој проект, чија цел е афирмација на македонската музика и домашните изведувачи, Општина Центар објави Јавен повик со вкупен буџет од 1.840.000 денари.

„И оваа година ветуваме добар ритам, позитивна енергија и изведувачи кои вреди да се слушаат. Под отворено небо, во Паркот на франкофонија сите заедно ќе уживаме во македонскиот звук“, порача градоначалникот Горан Герасимовски.

Организаторите треба да понудат четиричасовна програма со реномирани македонски бендови, соло изведувачи или забавни групи, и водител со соодветно искуство за ваков вид настани. Дополнително, потребна е и целосна техничка и логистичка поддршка за концертот.

Право на учество имаат регистрирани здруженија, организации и правни субјекти со седиште во Општина Центар – Скопје, кои делуваат во областа на културата, уметноста и маркетингот.

Рокот за пријавување е 7 дена од денот на објавување на повикот.

Апликациите се поднесуваат лично во Архивата на Општина Центар или по пошта, на адреса: Општина Центар – Скопје, Сектор за јавни дејности / Одделение за култура, ул. „Михаил Цоков“ бр.1, 1000 Скопје.

Датумот на одржување на „Нешто што ќе остане“ ќе биде дополнително објавен.

Текстот Герасимовски: Македонската музика повторно на сцената во Центар, пријави се за „Нешто што ќе остане“ е превземен од МАКФАКС.