Гори кај планинарскиот дом Китка, пожар се шири и кон висорамнината Витачево

Центарот за управување со кризи попладнево на прес-конференција соопшти дека и натаму е активен пожарот кај Сарај, а нови пожари има во општините Новаци и Кавадарци, како и над селото Црвена Вода кон планинарскиот дом Китка.

По интервенцијата на двата армиски хеликоптери пожарот кај селото Раовиќ во општина Сарај бил локализиран, но попладнево околу 15 часот повторно е активиран на три места по што е информирана Територијалната противпожарна единица на Град Скопје.

Нов пожар околу 14 часот е забележан и во атарите на селата Грумази и Ивени во општина Новаци, каде што гори сува трева и нискостеблеста шума, а друг пожар утрово е забележан и над селото Црвена Вода кон планинарскиот дом Китка.

„Пожарот на отворен простор помеѓу селата Барово и Вешје во Општина Демир Капија и натаму е активен и се прошири кон висорамнината Витачево кон село Страгово во Општина Кавадарци. На рамниот дел пожарот е изгаснат на фронт околу четири километри и засега висорамнината Витачево е безбедна. Пожарот е навлезен во шума во селото Барово, во место викано Балдовец, каде што теренот е стрмен и карпест и нема пристап и начин на приближување за гаснење за што се бара и интервенција од воздух“, информираше портпаролката на ЦУК, Надица Вчкова.

На овој пожар, како што истакна Вчкова, интервенираат противпожарни екипи од Кавадарци и Неготино.