Изведба на операта „Дрдорењата на Лапо“ од Џо Скитино, по повод 700 години од смртта на Данте Алигиери

На 19 ноември со почеток во 20 часот, на сцената на Националната опера и балет ќе се изведе оперското дело во еден чин и две слики „Дрдорењата на Лапо“ по повод 700 години од смртта на Данте Алигиери.

Светска премиера, надвор од границите на Италија, на операта „Дрдорењата на Лапо“ посветена на Данте Алигиери е напишана од Џо Скитино (музика) и Клаудио Салтарели (либрето).

Операта ќе биде под диригентската палка на Иван Еминовиќ, во изведба на тенорот Благој Нацоски (Данте), баритонот Џанпјеро Руџери (Лапо), хорот и оркестарот на Националната опера и балет.

Режисер е Дејан Прошев.

По повод 700 години од смртта на Данте Алигиери (1321) и на Лапо Салтарели (1320), двајцата прочуени поети од Фиренца и познавачи на политиката, создадено е ова оперско дело кое раскажува за случки од животот на двајцата уметници кои заедно минувале низ период одбележан со превирања важни за историјата на цела тогашна Италија. Особено се опеани посетите на Лапо во Рим, кај Папата Бонифациј VIII, кои довеле до судски процеси и одлука за протерување на двајцата поети од Фиренца.