Коалицијата „Менуваме“ најави протести, бара подобри услови за лицата со попреченост

Коалицијата „Менуваме“ упати неколку барања до Владата за подобрување на животот на лицата со попреченост. Од таму најавија дека ќе блокираат крстосници и ќе поставт шатори спроти Собранието доколку не бидат исполнети нивните барања.

Коалицијата, меѓу другото, бара покачување на додатокот за попреченост на 12.000 денари и во наредните две години да се изедначи со минималната плата независно од другите примања на корисникот, воведување на бели стапчиња, мерачи за шеќер и притисок за лица со попречен вид на товар на фондот, потоа пренамена и адаптација на центрите за згрижување во центри за рехабилитација на деца и лица со попреченост и посебни потреби.

Се бара и симнување на старосната граница за деца со попреченост и посебни потреби од 26 на 18, основање на институција Народен правобранител облигационен за деца и лица со попреченост и посебни потреби по моделот и методологијата на Норвешка и регулирање на донациски активности за лекување на ретки болести и посебни потреби, во земјата и странство.

Коалицијата „Менуваме“ вчера одржа протест пред Владата на кој изрази револт за неправдите со кои се соочуваат лицата со попреченост.