Комплетна реконструкција на игралиштето „Патрик“ во Аеродром, добива нов и модерен изглед

„Активностите за подобрување и модернизирање на спортската инфраструктура продолжуваат и во текот на оваа есен. Општина Аеродром почна со реконструкција на познатото игралиште ‘Патрик’, лоцирано зад трговскиот центар „Три бисери“. Станува збор за комплетна реконструкција на вкупна површина од 1.600 квадратни метри, која треба да заврши во текот на декември, а се наоѓа на локацијата на која пораснале голем број генерации и која значи многу за луѓето што живеат во Аеродром“, известува Општина Аеродром.

По завршување на активностите, Аеродром ќе добие целосно ново повеќенаменско игралиште за фудбал и ракомет на површина од 800 квадратни метри, кошаркарско игралиште на површина од 400 квадратни метри и инклузивно детско катче на површина од 400 квадратни метри.

Градоначалникот Муцунски, говорејќи за реконструкцијата на спортското игралиште, на својата фејсбук-страница потенцира дека Аеродром е убава општина и граѓаните го препознаваат тоа.

„Преку континуираните инвестиции ја потврдуваме нашата решеност да создадеме подобри услови за спорт и рекреација, места за нови спортски успеси и таленти“, истакна тој во својата објава.

Текстот Комплетна реконструкција на игралиштето „Патрик“ во Аеродром, добива нов и модерен изглед е превземен од МАКФАКС.