Кривичен изрече затворски казни за грабнувачите на Самоил Костадиновски кој се’ уште го нема

Донесена e пресуда за киднапирањето на Самоил Костадиновски, внук на екс министерот Љубе Бошковски, кој повеќе од една година не се знае каде е.

Првобвинетиот Виктор Милановски доби казна затвор од пет години и десет месеци, додека второбвинетиот Саша Челичиќ две години и два месеци.

Според Обвинителство на 3-ти март првообвинетиот Милановски заедно со Александар Трпков, кој е во бегство го грабнале Самоил, со закана дека ќе го убијат доколку не плати за претходно украдената дрога. Обвинетиот Саша Челикиќ со умисла им помогнал во извршување на кривичното дело грабнување.

Семејството на исчезнатиот Самоил Костадиновски не е задоволно од пресудата на судот и најави ќе се жали на повисок суд.

Таткото на Самоил, Љупчо Костадиновски по пресудата рече дека не може некој да украде велосипед или дрва и да добие повисока казна.

„Ќе се жалиме секако. Некого да го удриш ќе добиеш повисока казна од ова“, рече таткото додавајќи дека син му го нема, а казните се смешни.

Тој ја обвини полицијата дека ја заташкала целата работа кога почнала истрагата затоа што тоа е една група која работела за полицијата.

„Со вакви минимални казни ова не е држава, ова е картел“, рече таткото.

Обвинителството, пак, изрази одредено задоволство за епилогот во случајот со грабнувањето на Самоил Костадиновски. Обвинителот Дејан Петревски најави дека подоцна ќе се произнесе дали ќе има жалба на пресудата.

Прашан до каде е постапката за пронаоѓање на Самоил Костадиновски, обвинителот не сакаше да сподели информации во интерес на истрагата.

Текстот Кривичен изрече затворски казни за грабнувачите на Самоил Костадиновски кој се’ уште го нема е превземен од МАКФАКС.