Милошоски: Не може ароганцијата на Царовска да биде поважна од аргументите на родителите

Пратеникот на ВМРО-ДПМНЕ, Антонијо Милошоски, денеска изјави дека закон за учебници и друг наставен материјал е донесен на нетранспарентен начин, како и дека доколку се сака да се прифати самиот закон потребна е поширока дебата.

Тој ги коментираше најавените протести на родителите, со поддршка и од средношколската унија и средношколскиот глас против, како што рече, лошите реформи во образованието.

„Ние гледаме две страни. Едната страна е министерката Царовска која што промовира ароганција во овој предлог закон, а другата страна се родителите и учениците кои предлагаат аргументи. Сакаме да порачаме дека е време во законските решенија кои што се однесуваат на учениците, да им се даде можност на родителите да ги изложат своите аргументи и истите да бидат вградени во законот. Не може ароганцијата на министерката да биде поважна од аргументите на родителите“, посочи претставникот на ВМРО-ДПМНЕ.

Тој изрази надеж дека родителите ќе бидат сослушани и дека на крајот нивните аргументи ќе бидат вградени во било кое идно законско решение што се однесува на сите ученици.