Министерот Шаќири ги повика директорите на училиштата утре да организираат настава

Зборот на СОНК не издржа ниту едно деноноќие. Одлуката на синдикалното раководство денес е променета и тоа на штета на нашите млади, учениците од основните и средните училишта, реагира министерот за образование, Јетон Шаќири по одлуката на Синдикатот кој го отфрли владиниот предлог за зголеување на платите во образованието за 12 отсто.

Министерството за образование и наука цени дека премногу настава е изгубена досега и тоа мора да престане. Доволно голем е јазот во знаењето кој го создаде овој штрајк со целосно блокирање на работата на училиштата и тој повеќе не смее да се продлабочува, вели Шаќири.

Тој ги повика директорите на училиштата, како одговорни за организирањето на работата на овие образовни установи, од утре да ги отворат вратите на училиштата и да продолжат да организираат настава согласно законите за основно и средно образование. Тие имаат надлежности и одговараат за непостапување по истите, ги предупреди Шаќири.

Исто така, Министерството ги повикува и родителите/старателите на учениците од утре да продолжат да ги пуштаат/ носат своите деца на училиште.

„Да го завршиме ова лошо поглавје од тековната учебна година и да им овозможиме иднина на децата. Многумина од нив ги чекаат уписи во средни училишта или факултети. Многумина одлучиле да се вработат по завршување на средното образование, но неизвесно е доделувањето на дипломите во предвидениот рок. Да не ги уништуваме нивните планови и очекувања. Сите имаме одговорност!“, порача министерот.

Претходно, вчера начелно беше постигнат договор помеѓу претставници на СОНК и Владата за зголемување на платите за 12 отсто. Се чекаше одлука да донесе членството и Советот на СОНК, кое попладнево соопшти дека предлогот не е прифатлив и штрајкот продолжува.