Османи: Нема да газиме по црвените линии за да добиеме датум

Нема да газиме по нашите црвени линии за некој да биде задоволен со датум, изјави денеска министерот за надворешни работи Бујар Османи, коментирајќи дека Владата ќе се држи до позициите во парламентот.

Одговарајќи на новинарски прашања, Османи повтори дека високиот претставник на Европската унија за надворешна и безбедносна политика и потпретседател на Европската комисија, Жосеп Борел Борел не е одговорен за проширувањето во Европската унија.

„Борел со неговата посета на Скопје, како прва дестинација со цел да ја поздрави хармонизацијата на нашата надворешна политика со таа на Европската унија, беше исклучително важна, но од него не треба да се очекува да даде ветување. Ние имаме преземена обврска од 26 земји членки и имаме отворено прашање со Република Бугарија со која се обидуваме да го надминеме“, рече Османи на хуманитарен настан за помош на Украина.

Министерот нагласи дека наскоро ќе се одржи состанок на работната група за економски прашања со Бугарија, а пред некој ден се одржа и состанок на работната група за европски интеграции.