Осудени за Диво Насеље веќе една недела штрајкуваат со глад

Од девет лица, петмина осудени за настаните во Диво Насеље, Куманово, штрајкуваат една недела со глад и одбиваат да излегуваат на прошетка во затворот „Скопје“ во Шутка.

var ai_block_div = document.getElementsByClassName (‘ai-viewports’); ai_insert_code (ai_block_div [ai_block_div.length – 1]);

Бараат погодности како викенди со работен ангажман и интимни соби за средби со семејство односно сопругите. Ова би значело дека тие треба да бидат премести во друга казнено поправна установа бидејќи затворот во Шуто Оризари е истражен затвор со различен куќен ред. За ова е информиран и министерот за правда, Никола Тупанчески, кој кажа дека директорот на Управата за извршување санкции, Марјан Спасовски веќе разговарал со осудениците и се пред договор.

„Информиран сум од директорот дека има и официјално доставено допис дека дел од осудените лица штрајкуваат со глад. Споменавте за настаните за Диво Насеље во Куманово. Во позитивна насока се движат работите. Тоа значи да ги добијат сите привилегии согласно закон. Доколку се утврди дека не ги добиваат своите права и погодности, ќе се реагира според закон. Секое лице е приказна за себе“, кажа Тупанчески.

Тој додаде дека директорот Спасовски постигнал и договор да се прекине штрајкот со глад.

За осудените за настаните од Диво Насеље, има и барање за екстрадиција од косовските власти.

„Нема одлука во таа насока. Се работи за процес или за правна ситуација каде треба да бидат анализирани повеќе фактори, за Министерството за правда да ја донесе правилната одлука“, рече Тупанчески.

Вооружената престрелка во Куманово се случи во мај 2015 година. Осудените се косовски државјани. Убиени беа седуммина полицајци. Првостепената пресуда Основниот кривичен суд ја донесе на 2 ноември 2017 година, а беше потврдена во јули 2019 и од Апелацискиот суд. 33 лица беа прогласени за виновни од кои седуммина добија доживотен затвор; 13 беа осудени по 40 години затвор; шестмина по 20 години, а останатите добија од 12 до 18 години затвор.