Пријави против четворица измамници од Скопје со развиена шема за одземање на автомобили

пред 3 години

Одделенијата за криминалистички работи во Аеродром и Драчево до скопското Основно јавно обвинителство поднесоа кривична пријава против 27-годишниот Р.А., поради сомнение дека сторил шест кривични дела „измама“, како и против М.А.(18), К.К.(29) и Н.А.(29), поради сомнение дека сториле три кривични дела од истиот вид.

При тоа, тие се стекнале со противправна имотна корист од околу 5.472.790 денари.

Пријавените, кривичните дела ги извршиле во периодот од 1 ноември 2019 до 30 ноември годинава на идентичен начин.

Откако ќе забележале објавен оглас за продажба на поскапи автомобили, се јавувале на објавениот телефонски број од огласот и во контакт со оштетените се договарале да се сретнат на претходно одреден нотар, за купопродажба на возилото.

По остварената средба кај нотарот, пријавените лица се договарале со оштетните во договорот да се наведе сума на пари која нема да ја надмине законската регулатива за плаќање во готово, додека останатиот дел од сумата да биде исплатена на рака.

По потпишување на договорот, пријавените ги носеле оштетените на различни места со изговор дека ќе дојде трето лице кое ќе ги донесе остатокот од парите, но во одреден момент, искористувајќи го невниманието на оштетените, им ги земале клучевите и заминувале со возилото без исплата.

Share
Scroll to Top