Советот ја отфрли иницијативата на Ристоска: Немало политички притисоци врз обвинителката

Советот на јавни обвинители не утврди притисоци врз обвинителката Ленче Ристоска и едногласно ја одби нејзината иницијатива, во која таа тврдеше дека нејзината самостојност била нарушена поради надворешни влијанија поврзани со предмети против ВМРО-ДПМНЕ.

Ристоска во поднесокот навела дека е изложена на напади од политички структури на партијата, посочувајќи изјави на премиерот и содржини објавени на партиската веб-страница. Сепак, Комисијата на Советот оценила дека таквите изјави не претставуваат конкретен притисок врз нејзината работа.

Членката на Советот, Маријана Илиевска, образложи дека во случајот недостига јасна поврзаност меѓу изјавите и евентуално влијание врз одлучувањето на обвинителката. Таа појасни дека поради отсуство на конкретни и индивидуализирани елементи не може да се утврди реално влијание врз обвинителката. Според неа, и покрај тоа што премиерот ја квалификувал со термини како „медиокритет со политичка матрица“, таквите изјави не се поврзани со конкретни дејства што би ја загрозиле нејзината самостојност во одлучувањето, ниту нејзиниот професионален интегритет.

Со усвоениот заклучок, Советот констатира дека не постои надворешно влијание врз работата на Ристоска и дека нејзиниот професионален интегритет не е нарушен.

Текстот Советот ја отфрли иницијативата на Ристоска: Немало политички притисоци врз обвинителката е превземен од МАКФАКС.