Усогласен пристапот за подготовка на документ за долгорочна стратегија за развој на државата

Претседателот Стево Пендаровски денеска ги прими Фатмир Битиќи, вицепремиер задолжен за економски прашања, Рејчел Галовеј, амбасадорка на Обединетото Кралство, Нарине Сахакјан, постојана претставничка на УНДП и Росана Дуџак, постојан координатор на ОН во Република Северна Македонија, а во однос на процесот на изготвување на „Национална развојна стратегија“.

Како што информираат од претседателскиот Кабинет, на состанокот била постигната согласност и синхронизација на преземената иницијатива од страна на претседателот Пендаровски, „МКД2030“ со процесот на креирање на „Националната развојна стратегија 2021-2041“.

Процесот ќе биде заснован на принципите на национална сопственост, широка консултација, интегрирање на постоечките процеси за интеграција во ЕУ и Агендата 2030 и иновативност.

„НРС 2021-2041 и МКД2030 претставуваат единствен сеопфатен процес за долгорочно планирање, следење и надградување, во коj се и ќе продолжат да бидат вклучени претставници од сите сегменти во општеството“, наведуваат од Кабинетот на Пендаровски.

Оперативната структура на процесот што треба да обезбеди вклученост на највисоко политичко, административно, научно, бизнис и општествено ниво, ќе ја води Национален совет за развој, со кој ќе претседава претседателот на државата.

Во овој совет ќе учествуваат и претседателот на Владата и претседателот на Собранието, партиски координатори во Собранието, како и претставници од академијата, бизнисот, работниците, невладиниот сектор и младите.

Првата фаза од креирањето на овој стратешки документ ќе биде финансирана од Британската амбасада во Скопје, со техничка поддршка од страна на Организацијата на Обединетите нации преку УНДП, а ќе резултира со методологија и оперативна структура која ќе се примени при развивањето на стратегијата, што ќе претставува втора фаза на проектот.