Хоџа: Трајни решенија и зелен пресврт во третманот на отпадот, водите и аерозагадувањето

Министерот за животна средина и просторно планирање Муамет Хоџа, денеска во одговор на прашање поставено во врска со справувањето со отпадот, одговори дека регионалниот систем за управување за отпад е во фокусот на негово работење, каде се работи за важна стратегија која конечно го гледа светлото на денот, и која повеќе не е само документ на хартија, туку активно се имплементира на терен.

Дивите депонии, слабо функционалните или нефункционални депонии, сите стануваат минато, со еден ваков целосен пресврт во начинот на кој проблемот со отпадот е третиран, а кој го гледаме со отпочнувањето на инфраструктурата и опремата за трите регионални центри во Русино, Новаци и Свети Николе, беше посочено во Собранието.

На прашањето поврзано со аерозагадувањето како еден од најсериозните предизвици, Хоџа напомена дека фокусот е ставен на индустријата и институциите, бидејќи смета дека таму одговорноста и примерот треба да се посилни.

„Со новиот Закон за индустриски емисии кој стапува на сила во 2027 година и најавената јавна расправа за новата дозвола на УСЈЕ, се работи на градење на довербата на граѓаните, низ отворен дијалог, со факти и експертска поддршка.
Кај 21 државен објект веќе е извршена промена кон еколошки начин на загревање. Ова се дел од 70-тина објекти низ државата кои се опфатени со овој проект на Министерството за животна средина. Во однос на мерките за домаќинствата, периодов се случува распределбата на ваучери за инвертери, мерка која ја спроведува Министерство за енергетика, со која 4300 семејства помалку ќе загадуваат, менувајќи го начинот на греење на своите домови“.

Хоџа одговараше и на прашање поврзано со водите, за што потенцираше дека управувањето со водите не е само техничко, туку стратешко прашање, бидејќи системски се унапредува управувањето со водите преку реформи, инвестиции и усогласување со ЕУ стандарди.

Текстот Хоџа: Трајни решенија и зелен пресврт во третманот на отпадот, водите и аерозагадувањето е превземен од МАКФАКС.