Вандализам и оштетување на урбаната опрема и детските игралишта во Општина Карпош

Од Општина Карпош изразуваат сериозна загриженост за зачестените случаи на вандализам и оштетување на урбаната опрема и детските игралиштата на цела територија на општината.

Во изминатиов период, наведуваат од општината, е евидентирано оштетување на клупи, корпи за ситен отпад, паркинг држачи за велосипеди, детски и спортски реквизити и останата урбана опрема.

Последниот случај на кршење на канделабра, на највандалски начин, од страна на малолетни деца, дополнително, додаваат од таму, ја отвора потребата од поголема грижа, одговорност и превенција. Покрај нанесената материјална штета, овде станува збор и за сериозно загрозување на безбедноста по сите граѓани на јавниот простор.

Сите досега евидентирани случаи биле пријавени до Полициска станица Карпош од каде што било добиено известување за поголемо присуство на полициските служби на терен како и расчистување на овие случаи.

Од општината апелираат до сите граѓани за совесно и одговорно однесување кон урбаната опрема и јавниот простор како заеднички имот и навремено пријавување на секој случај на вандализам до надлежните служби.

„Апелираме и до родителите за поголема информираност за движењето и однесувањето на нивните деца, како и разговори за значењето од зачувувањето на јавниот простор и последиците од несоодветното однесување.

Да го чуваме заедничкиот простор затоа што јавниот имот е одговорност на сите нас“.

Текстот Вандализам и оштетување на урбаната опрема и детските игралишта во Општина Карпош е превземен од МАКФАКС.