Ковачки: Од охридската полиција украдени биле и бомби и гранати, Спасовски итно да поднесе оставка

Ограбена е полициска станица, а власта се однесува како ништо да не се случило, изјави пратеникот од ВМРО-ДПМНЕ, Драган Ковачки.

Тој рече дека според информациите кои ги објавија медиумите, но и според нивни сознанија не се работи само за кражба на оружје и муниција за автоматско оружје, туку и за бомби и гранати, а за кои во МВР немаат точна евиденција.

„МВР не знае што точно и во колкава количина е украдено. Објектот на магацинот се наоѓа во кругот на поранешната касарна Михајло Апостолски во Охрид, а сега е во сопственост на полицијата. Магацинот има обезбедување и е во круг на повеќе полициски објекти, а непосредно спроти истиот е канцеларијата на началникот на РЦ Запад. Оттука се влече заклучокот дека крадците или се поголема организирана група која е голема опасност за мирот на државата или се во договор со Оливер Спасовски“, обвини Ковачки.

и.

Според него, украдена е муниција доволна за вооружување на цела единица. Тоа не е оружје или муниција кое може да се користи во лов или за било какви рекреативни цели, вели Ковачки, туку станува збор за автоматско оружје, муниција, бомби и гранати кои се користат исклучиво за боеви дејствија.

„Кога полицијата и криминалците се едно, епилогот е кражба на оружје од полициски магацин и предизвикување на несигурност кај населението. Спасовски или е целосно неспособен да го обезбедува имотот на МВР или е во целосна коалиција со криминалот и ги прикрива извршителите. Ова се случило кога криминалците ќе го чувствуваат МВР за свој дом“, додаде Ковачки.

Тој заклучи дека полицијата под водство на Спасовски, одамна го изгуби кредибилитетот и авторитетот.

ВМРО-ДПМНЕ повтори дека Спасовски треба веднаш да си поднесе оставка.