МВР ги демантира обвинувањата за набавката на гуми за возила

Министерството за внатрешни работи ги демантира тврдењата на пратеникот на ВМРО-ДПМНЕ, Игор Јанушев, кој денеска ги изнесе на прес конференција, за набавката на гуми за потребите на МВР.

„ За предметната постапка склучена е рамковна спогодба со која на МВР му е овозможено да набавува пневматици со количини за кои има потреба, кога има потреба, во следниот период од три години. Постапката е поделена на четири дела, по видови возила и вкупно има 210 различни димензии и видови на пневматици. Во МВР последните години се води детална евиденција пред правење нарачка за нови пневматици, односно колку километри поминало возилото и временски кога се промениле гумите последен пат, за разлика од минатото кога се нарачувале гуми без никаква евиденција за потребите од истите и се делеле гуми по блискост на раководни лица со барателите.

МВР за прв пат во тендерот предвиде гумите да се менуваат децентрализирано во сите сектори за внатрешни работи, а не како во минатото кога сите возила од цела држава мораа да доаѓаат во Скопје и да чекаат промена на една до две локации два пати годишно и да прават дополнителни трошоци. Во новата постапка се предвидува гумите да бидат произведени пред не повеќе од 12 месеци и бараме гаранција од 24 месеци, што претходно не било случај. Исто така, бараме и бесплатна промена сезонски за целиот период на гаранција. И покрај сите овие барања кои влијаат на цената, сепак избраниот понудувач има поднесено пониска понуда за два од вкупно три дела, каде што поднел понуда и претходниот понудувач“ се вели во реакцијата на МВР.

Оттаму додаваат дека за сите информации за било која јавна набавка МВР е достапно за информации за сите медиуми и граѓани.