Петрушевски: Шахпаска да не се плаши од Царовска и да побара одгoворност од нејзината свекрва и директорката на „Ангел Шајче“

И неколку дена по труењето на педесетина дечиња во кумановската градинка „Ангел Шајче“ молчи директорката на градинката и свекрвата на Царовска, изјави на денешната прес-конференција, Бране Петрушевски, пратеник од ВМРО-ДПМНЕ.

„Свекрвата на Царовска е задолжена за хигиената како медицинско лице и таа исто како и директорката мора да сноси одговорност. Педесетина деца се заразија, а МТСП кое ги има надлежностите над градинката уште од времето кога Царовска беше министер не реагира“, истакна Петрушевски.

Според него, Царовска како министер за труд и социјална политика ги зема надлежностите на Максим Димитриевски и со тоа станала заштитник на нејзината свекрва.

„Дали е вистина дека невенчаниот сопруг на Царовска снимал и спотови со дрон за градинката каде е вработена неговата мајка, поточно свекрвата на Царовска? Дали се работи за други интереси? Зошто власта молчи? Дали се штити свекрвата на Царовска? Одговорност мора да има! Не може педесетина дечиња да се затруени, а никој да не понесе одговорност“, порача претставникот на опозициската партија.

Тој ја повика Јагода Шахпаска, да се охрабри и како што кажа, да не се плаши од Царовска за да побара одговорност од директорката и свекрвата на министерката за образование.

„Шахпаска како министер за труд мора да ги штити децата, а не функционерите од власта“, рече Петрушевски.