Сабриу од Њујорк: Правда за жените значи систем што се прилагодува на преживеаните од родово базирано насилство

Државниот секретар во Министерството за социјална политика, демографија и млади, Фатмир Сабриу, ја претставува Република Северна Македонија на 70-тата сесија на Комисијата за статусот на жените во Њујорк, што се одржува во рамките на Обединетите нации. Настанот обединува претставници на држави од целиот свет кои ги споделуваат своите искуства, политики и практики за унапредување на статусот на жените во општеството.

Во текот на оваа недела, Сабриу учествува на повеќе настани, на кои има можност да ги презентира политиките и посветеноста на Северна Македонија за унапредување на родовата еднаквост и зајакнување на улогата на жените во општеството.

Во своето излагање на панел-дискусијата насловена „Зајакнување на пристапот на жените до правда: пристап насочен кон преживеаните од родово базирано насилство (РБН)”, Сабриу говореше за институционалните и правните рамки во Северна Македонија насочени кон обезбедување правда за преживеаните од родово базирано насилство.

Тој се осврна на мултисекторскиот систем за заштита на жртвите од родово базирано и семејно насилство, во кој активно учествуваат надлежните институции, судските органи и граѓанските организации. Посебен акцент беше ставен на партнерствата со граѓанскиот сектор, стратегиите за обезбедување одржливост на услугите, нивното поврзување со социјалните и економските услуги, како и на координираната соработка меѓу судовите и социјалните служби со цел долгорочна заштита и реинтеграција на преживеаните.

„Промовирањето инклузивна и правична правда бара повеќе од формални гаранции. Потребно е законите, институциите и постапките ефикасно да одговорат на реалните искуства на жените и девојките во сета нивна различност,“ порача Сабриу.

Тој посочи дека усогласувањето со меѓународните стандарди, вклучително и обврските што произлегуваат од Истанбулската конвенција, поставува јасна основа за делување, но дека вистинската ефикасност се мери преку имплементацијата.

„Ефикасноста се мери преку имплементацијата – преку координација, професионалност и доверба во институциите,“ истакна Сабриу.

Тој нагласи дека мултисекторскиот пристап претставува единствен одржлив модел за заштита на преживеаните.

„Кога полицијата, центрите за социјална работа, судовите, обвинителството, здравствените институции и граѓанските организации постапуваат координирано, системот станува предвидлив и безбеден за преживеаната. Интегрираните услуги, лиценцирањето на давателите на услуги, стандардизираната проценка на ризик и управувањето со случаи се конкретни чекори кон систем кој функционира,“ нагласи Сабриу.

Според него, пристапот насочен кон преживеаните подразбира дека безбедноста, економската независност и социјалната реинтеграција се подеднакво важни како и судската заштита.

„Затоа нашата заедничка обврска е јасна: институции што постапуваат со должно внимание, одржливо финансирање на услугите, инвестиции во економската автономија на преживеаните и општество во кое пријавувањето не значи ризик, туку заштита,“ истакна Сабриу.

Тој додаде дека пристапот насочен кон преживеаните не е само методологија, туку и вредносна определба.

„Тоа значи дека системот не бара од жената да се приспособи кон институциите – туку институциите се приспособуваат кон нејзините потреби,“ заклучи Сабриу.

Текстот Сабриу од Њујорк: Правда за жените значи систем што се прилагодува на преживеаните од родово базирано насилство е превземен од МАКФАКС.