Секој има право да протестира, но барањата за минимална плата синдикатите треба да ги кажат на седница на ЕСС не на улица, вели Дурмиши

Министерот за економија и труд Бесар Дурмиши ја потпишал минималната плата без согласност од Економско – социјалниот совет(ЕСС), што е законска обврска, за да не се блокира целата држава. Најави дека ќе закаже седница на ЕСС во моментот кога комисијата за утврдување репрезентативност ќе донесе одлука кој синдикат е репрезентативен, обврска која досега не е завршена оти Владата ги повлече своите членови па назначуваше нови, а новиот состав не успеа да ја донесе одлуката пред истекот на законскиот рок за зголемување на минималната плата. Денешниот протест на Сојузот на синдикати на Македонија (ССМ) за 500 евра минимална плата министерот Дурмиши вели дека е нивно демократско право, но нагласи дека минималната плата треба да се договара на седница на ЕСС, а не на улица.

„Живееме во демократија. Секој има право да излезе на улица и да протестира, да го искаже својот револт, но јас пак ќе кажам дека на синдикатите им е истечен мандатот и веќе не се репрезентативни. Ние како Влада ја формиравме комисијата која требаше да утврди репрезентативност на синдикатите, таа комисија веќе работи. Очекувам да заврши со работа час поскоро, таа комисија упорно работи. Веднаш откога ќе се определи кој синдикат е репрезентативен јас ќе свикам седница на Еконосмко – социјалниот совет. Синдикатите треба таму да ги кажат своите барања, а не на улица“, вели министерот Дурмиши.

Минималната плата министерот вели дека е покачена за 1800 денари според важечката методологија за која дале согласност и синдикатите и работодавачите. Со усогласувањето, минималната плата изнесува 400 евра, но за објавена е без согласност на ЕСС.

„Согласност нема поради тоа што нема репрезентативност од синдикатите. Јас според законот кој е на сила и кој е потпишан и од синдикатите и од работодавачите обврзан сум и по одлука на Влада пред 31 март, да ја објавам минималната плата. Знаеме дека од минималната плата потоа се пресметува и просечната плата и другите плати. Замислете ако не ја објавевме ние до 31 март, ќе се блокираше целата држава, ќе се блокираа сите институции и приватниот сектор немаше да може да пресмета плати за вработените“, рече министерот Дурмиши.

ССМ не отстапува од барањето минималната плата да биде 500 евра и затоа денес излегува на протест. На улица ќе излезат 300 челнови на највисокото раководство на ССМ заедно со работниците. Пред Собранието ќе им порачаат на пратениците дека не може да има за пратениците, а да нема за работниците, а пред Влада на владините функционери ќе им порачаат дека не може да се одлучува за работниците беа работниците.

Текстот Секој има право да протестира, но барањата за минимална плата синдикатите треба да ги кажат на седница на ЕСС не на улица, вели Дурмиши е превземен од МАКФАКС.