Нестварно, англиските клубови досега потрошиле 1,87 милијарди евра за засилувања

Ова лето, клубовите од англиската Премиер лига ги поместуваат сите граници поставени досега кога станува збор за парите инвестирани во зајакнување на нивните тимови. И сè уште не ја завршиле работата.

Според специјализираниот фудбалски портал „Трансфермаркт“, од јуни, кога се отвори летниот трансфер пазар, до денес, елитните англиски клубови потрошиле импресивни 1,87 милијарди евра за нови играчи.

Поголемиот дел од овие пари од нивните сметки, за засилувања, ги издвоија само неколку од најмоќните клубови.

Ливерпул доминира.

„Црвените“ потрошија 307 милиони евра за нови играчи во тековниот преоден рок, а клубот од „Енфилд“ инвестираше речиси 200 милиони само за двајца играчи, Флоријан Вирц и Уго Екитике.

Втор на листата на најголеми трошаџии е актуелниот светски шампион Челзи.

„Сините“ направија голем дел од работата во зајакнувањето на играчкиот кадар со инвестиција од 242 милиони евра, а за тие пари ги доведоа Жоао Педро (70 милиони), Џејми Гитенс (65 милиони), Естевао (34 милиони), Лиам Делап (35,5 милиони)…

Арсенал е трет на листата со 156 милиони инвестирани досега за нов кадар во составот, иако вредноста на трансферот на Виктор Ѓокереш, чиј потпис за „топџиите“ е прашање на денот, наскоро треба да се додаде на оваа сума.

Арсенал сигурно ќе ја надмине сумата од 200 милиони евра ова лето за засилувања, кога Швеѓанецот конечно ќе го потпише договорот.

Манчестер јунајтед потроши приближно колку и Арсенал, 152,7 милиони евра.

Поединечно, клубот од „Олд Трафорд“ даде најмногу пари за трансферот на Брајан Мбеумо од Брентфорд, речиси 80 милиони евра.

На петтото место е Манчестер сити (145 милиони), по него Тотенхем (140 милиони), а Сандерленд е исто така високо на оваа листа со 115,5 милиони за нови имиња, додека Брајтон, Барнли и Лидс се веднаш зад нив.

Сите три споменати клуба потрошија во опсег од 70-80 милиони за засилувања.

Финансискиот јаз помеѓу повеќето англиски клубови, не само најсилните, и остатокот од Европа, се чини, а тоа го покажуваат и трансферните вредности, никогаш не бил поголем.