Хуркач го победи пријателот Синер и стана првиот Полјак со Мастерс титула

Полскиот тенисер Хуберт Хуркач го освои најголемиот трофеј во својата кариера, победувајќи го италијанскиот тинејџер Јаник Синер со 7:6(4)/6:4 во финалето на Мастерсот во Мајами, во необична пресметка на двајца тенисери кои се блиски пријатели и кои играат заедно во двојки.

19-годишниот Синер беше сензацијата овие две недели на Флорида, покажувајќи игра со која може да се надева на големи успеси во иднината, но 24-годишниот Хуркач беше едноставно поискусен во клучните моменти.

Полјакот губеше со 0:3 и со 5:6 во првиот сет, но се врати да израмни и го освои тај-брејкот, по што поведе со 3:0 во вториот. Сепак, Синер не се откажа и до крај го намачи Полјакот до неговата трета титула, по таа во Винстон-Сејлем во 2019 и таа од Делреј Бич од јануари оваа година.

Хуркач сега е првиот полски тенисер во историјата со Мастерс 1000 титула и од понеделник ќе биде на 16. место на АТП листата. Титулата е сосема заслужена ако се знае дека на патот до финалето тој ги победи Стефанос Циципас, Андреј Рубљов, Денис Шаповалов и Милош Раонич.