(Видео) Реконструкција на култниот стадион – Ќе се урива легендарната трибина

Култниот стадион „Ла Бомбониера“ на Бока Јуниорс, еден од симболите на Буенос Аирес, влегува во нова ера. Планирана е голема реконструкција, која би го зголемила капацитетот на стадионот од сегашните 58.000 на 76.000 до 2030 година.

Проектот предвидува рушење на добро познатата западна трибина, која се издвојува од преостанатите три поврзани трибини поради својот специфичен вертикален дизајн и пократките катови.

На нејзино место ќе се изгради нова, модерна трибина со шест ката, која ќе биде проширена и поврзана со остатокот од стадионот. Само новата трибина треба да има капацитет од околу 18.000 гледачи, што ќе го зголеми вкупниот капацитет на стадионот на планираните 76.000 седишта.

Стадионот „Ла Бомбониера“ е дизајниран од Словенецот Виктор Сулчиќ, архитект кој живеел и работел во Аргентина многу години. Изграден е во 1938 година, а последен пат реновиран во 1996 година.

Иако во светот е познат како „Ла Бомбониера“, стадионот официјално променил три имиња низ својата историја. Прво се викал Естадио де Бока Јуниорс, потоа Естадио Камило Чичеро, а денес се вика Естадио Хозе Алберто Армандо.

Сепак, малкумина го користат официјалното име бидејќи прекарот е задржан од самиот почеток. Прекарот „Бомбониера“ наводно се појавил затоа што архитектот Сулчиќ рекол за време на дизајнот дека стадионот го потсетува на кутија чоколадо.