Гана му врачи отказ на Крис Хјутон

Фудбалскиот сојуз на Гана го отпушти селекторот на репрезентацијата Крис Хјутон по елиминацијата во групната фаза на Африканскиот куп на нации (КАФ).

Во понеделникот и покрај два гола предност, Гана ремизираше 2:2 против Мозамбик и со два бода го заврши натпреварувањето во групата Б. Претходно тие ремизираа 2:2 против Египет и загубија од Зеленортските Острови со 2:1.

Во Сојузот се надеваа дека репрезентацијата може да помине како најдобро третопласирана, но резултатите од синоќешните натпревари не се поклопија.

„Крис Хјутон е ослободен од должноста и одлуката стапува на сила веднаш. Извршниот совет исто така одлучи да го распушти стручниот штаб на националниот тим“, се вели во соопштението на Фудбалскиот сојуз на Гана, пренесе Би-би-си.

Поранешниот тренер на Њукасл и Брајтон почна да работи во репрезентацијата на Гана во февруари 2022 година како технички советник, а селектор стана по Светското првенство во Катар кога поради лошите резултати беше сменет Ото Адо.

Роден е во Англија, но 12 години беше репрезентативец на Ирска од каде што е мајка му, додека татко му од Гана.

Во декември 2022 година, Гана го заврши Светското првенство како последно пласирана во групата Х со победа во три натпревари.

Гана и претходниот Африкански куп, во 2021 година во Камерун, го заврши во групната фаза.