„Инфантино треба да биде испратен во психијатриска установа“

Поранешниот претседател на ФИФА, Сеп Блатер, го нападна својот наследник Џани Инфантино, нарекувајќи го диктатор, велејќи дека можеби ќе му треба психијатриска помош.

Во интервју за германското списание „Шпигел“, објавено во средата, Блатер зборуваше за начинот на кој Инфантино ја води ФИФА, а особено ја осуди одлуката за доделување на наградата за мир на американскиот претседател Доналд Трамп, како и плановите за идна продажба на дел од комерцијалните права на Светското првенство.

„ФИФА страда. Моментално ја води човек кој дозволил неговата визија да биде замаглена“, рече Блатер, оценувајќи дека доделувањето на наградата за мир на Трамп е „срамно“:

„Зошто би направиле нешто такво? Инфантино да ја даде наградата за мир на некој што веднаш потоа води војна против Иран? Тоа е лудо.“

Блатер, исто така, го критикуваше начинот на кој Инфантино, според него, ја обезбедува поддршката од националните фудбалски асоцијации за новиот мандат. Тој тврди дека претседателот на ФИФА добива гласови ветувајќи повеќе пари.

„Ако гласате за мене, ќе добиете многу повеќе пари отколку порано“, ја опиша Блатер наводната порака на Инфантино до претставниците на националните сојузи.

Потоа тој презентираше уште построга оценка за неговиот стил на управување.

„Тој е диктатор. Луѓето во ФИФА ми велат дека никој не треба да се вози во лифт со него. Тој е недопирлив“, истакна Блатер.

Особено го налутил одбиениот план за продажба на дел од комерцијалните права на Светското првенство. Инфантино, според Блатер, го изгубил чувството за граници.

„Инфантино повеќе не познава никакви граници. Тој не разбира ништо од тоа. Мислам дека можеби еден ден треба да биде испратен во психијатриска установа“, рече Швајцарецот.

Foto/ Depositphotos