Леброн нема да игра на ОИ, Кари се сомнева дека ќе игра во Лос Анџелес

Четирикратниот најкорисен играч (MВП) на американската професионална кошаркарска лига (НБА) и репрезентативец на Соединетите Американски Држави (САД) Леброн Џејмс објави дека нема да игра на следните Олимписки игри во Лос Анџелес.

„Веќе го знаете мојот одговор. Ќе ги гледам“, рече 40-годишниот Џејмс во подкастот „Mind the Game“, објави „ESPN“.

Џејмс освои златни медали со репрезентацијата на САД на Олимписките игри во Париз, Лондон и Пекинг, како и бронза на Олимписките игри во Атина.

Во истата епизода од подкастот се појави и двократниот MВП на НБА и сонародник на Џејмс, Стивен Кари, кој рече дека има „силни сомнежи“ дека ќе настапи на Олимписките игри во Лос Анџелес.

„Со Божја помош, сè уште имам избор и физичка опција каде што можам да направам влијание врз тимот. Никогаш не вели никогаш, но многу се сомневам во тоа. Многу се сомневам во тоа“, рече 37-годишниот Кари, чии Олимписки игри минатата година беа негови први.

Џејмс и Кари заедно освоија златен медал на Олимписките игри во Париз, каде што репрезентацијата на САД ја победи репрезентацијата на Србија во полуфиналето, а во финалето ја победи Франција.

Олимписките игри во Лос Анџелес се закажани од 14 до 30 јули 2028 година.