Манчестер Сити потврди дека Гвардиола го напупта клубот

Фудбалскиот клуб Манчестер Сити поврди дека Пеп Гвардиола (55), десет години, го напушта клубот на крајот од сезоната. Каталонскиот стручњак, кој пристигна во Сити во јули 2016 година, го трансформираше клубот и ќе се збогува со 20 освоени големи трофеи, што го прави најуспешниот тренер во историјата на клубот.

И покрај тоа што ја напушта тренерската позиција, Гвардиола ќе ја продолжи соработката со „City Football Group“, во улога на глобален амбасадор, каде што ќе дава стручни совети на клубовите во рамките на групата и ќе работи на специјални проекти, се вели во соопштението од клубот од Манчестер.

"What a time we have had together." 🩵 pic.twitter.com/WpkFecBYT4

— Manchester City (@ManCity) May 22, 2026

Гвардиола: Не ме прашувајте за причините за заминувањето

„Кога пристигнав, првото интервју што го направив беше со Ноел Галагер. Си заминав мислејќи: „Добро… Ноел е тука? Ова ќе биде забавно“, започна Гвардиола.

„И какви моменти живеевме заедно. Не ме прашувајте за причините за заминување. Нема постојат. Но длабоко во себе знам дека моето време дојде. Ништо не е вечно, ако беше, ќе останев тука. Вечно ќе биде чувството, луѓето, спомените, љубовта што ја имам кон мојот Манчестер Сити.“

„Ова е град изграден со работа, со многу вложен труд. Можете да го видите тоа во бојата на тулите. Во луѓето што доаѓаа рано, а остануваа до доцна. Фабриките. Синдикатите. Музиката. Индустриската револуција и како таа го промени светот. Мислам дека со текот на времето го сфатив тоа, а исто така и моите тимови.“

„Работевме. Страдавме. Се боревме. И го направивме тоа на наш начин. Начинот на Сити. Напорната работа доаѓа во многу форми. Патувањата во Борнмут, кога ја загубивме Премиер лигата, а вие бевте таму. Патувањата во Истанбул, и вие бевте таму.“

„Се сеќавате на нападот во Манчестер Арена, кога овој град му покажа на светот како изгледа вистинската сила? Не гнев. Не страв. Само љубов. Заедништво. Поврзаност. Обединет град.“

„Се сеќавате кога ја изгубив мајка ми за време на КОВИД и почувствував како клубот ме носи низ тоа? Навивачите, персоналот, луѓето од Манчестер, ми дадовте сила кога ми беше најпотребна. Крис, моите деца, целото мое семејство, бевте таму како и секогаш. Халдун, и ти беше тука.“

„Играчите не забораваат – ниту еден момент, мене, мојот персонал, овој клуб, ништо. Сè што направивме, го направивме за сите вас. Вие бевте едноставно извонредни. Сè уште не го знаете тоа, но оставате наследство.“

„Значи, како што моето време завршува, ве молам бидете среќни. Оаза повторно обединета. Дами и господа, ви благодарам што верувавте во мене. Ви благодарам што ме туркавте. Ви благодарам што ме сакате. Тони Волш рече во својата незаборавна песна дека ова е местото. Жал ми е, Тони: ова е моето место. Ноел… Бев во право. Беше проклето забавно. Ве сакам сите.“

Пофални зборови од врвот на клубот

„Во текот на последните десет години, чесноста и довербата беа основата врз која со Пеп поминавме низ секоја ситуација, секогаш свесни дека заедно можеме да го најдеме вистинскиот одговор. Денес, вистинскиот одговор е Пеп да го заврши своето патување како менаџер на Манчестер Сити“, рече претседателот на клубот, Халдун Ал Мубарак.

„Имаше моменти по патот кога можеше да застане и тоа ќе беше доволно. Но, некако Пеп секогаш наоѓаше нова енергија и продолжуваше, наоѓајќи различни и иновативни начини за победа и успех. Како резултат на тоа, клубот има деценија спомени и успех за кои ќе биде засекогаш благодарен, но и многу повеќе од тоа – еволуција што не може да се поништи.

Неговиот уникатен пристап кон тренерската работа му овозможи постојано да ги доведува во прашање утврдените вистини во нашата игра. Затоа во последните десет години тој не само што го направи Манчестер Сити подобар, туку го направи и фудбалот подобар.“

„Бевме сведоци на неговата величина и посветеност“

Главниот извршен директор Феран Соријано додаде: „Имавме привилегија да работиме заедно со Пеп Гвардиола десет години. Бевме сведоци на неговата величина и посветеност, но исто така уживавме во неговото друштво, пријателство и човечност. Каква привилегија беше тоа за многумина од нас во Манчестер Сити!“

„Наследството на Пеп е извонредно, а неговото вистинско влијание ќе биде подобро ценето од историчарите на Манчестер Сити во иднина. Тој беше одлучувачкиот фактор за нашето патување кон глобална извонредност, а неговите високи стандарди ќе бидат репер за нашите идни играчи и тренери. Ако има нешто потешко од победата, тоа е повторното освојување.“

Потребна е неверојатна упорност, отпорност и понизност за да се започне одново секоја година, со истата енергија. Тоа е она што го направи Пеп. Никој пред десет години не би верувал дека можеме да освоиме 20 трофеи во оваа деценија, играјќи забавен фудбал со толку висок квалитет. Беше незамисливо… а сепак беше сторено.

Додека го славиме минатото, исто така сме среќни што знаеме дека Пеп ќе остане со групата и дека ќе можеме да го користиме неговото знаење и искуство во многу од нашите други клубови. Засекогаш ќе му бидеме благодарни на Пеп. Тој е легенда на Сити… засекогаш“, заклучи Соријано.

Деценијата што ја промени историјата на клубот

Рекордот на Гвардиола од шест титули во Премиер лигата, една Лига на шампиони, три ФА купа, пет Лига купа, едно Светско клупско првенство, еден Суперкуп на УЕФА и три Комјунити Шилдс раскажува дел од приказната за најголемиот период во историјата на Сити.

Гвардиола не само што победуваше со неверојатна конзистентност, туку постави и голем број значајни рекорди. Сезоната 2017/18 ќе биде запаметена по освојувањето на 100 поени во Премиер лигата, што е апсолутен рекорд. Таа сезона, Сити постигна и рекордни 106 гола, оствари најмногу победи (32) и најголема разлика, во однос на второпласираниот според бројот на бодови, во историјата на лигата (19 поени).

Веднаш следната сезона, тој го предводеше тимот до освојување на сите четири домашни трофеи, што е прв таков случај во историјата на англискиот фудбал.

Врвот беше достигнат во сезоната 2022/23, освојувајќи ја тројната круна – Лигата на шампионите, Премиер лигата и ФА Купот. Набрзо следеа трофеите од Суперкупот на УЕФА и Светското клупско првенство на ФИФА, што го направи Сити првиот англиски клуб што ги освоил петте најголеми трофеи во една календарска година.

Во сезоната 2023/24, Гвардиола го предводеше Сити до четврта последователна титула во англиската Премиер лига, подвиг што претходно се сметаше за невозможен. Тој ја заокружи својата последна сезона со освојување на ФА Купот и Лига Купот. Гвардиола заминува како менаџер со најдолг стаж во историјата на Сити,а последниот 593-ти ќе му биде в недела против Астон Вила.

Неизбришлив белег во англискиот фудбал

Освен трофеите и рекордите, многумина веруваат дека Гвардиола засекогаш го промени англискиот фудбал. Неговото стилско влијание, видливо низ целата англиска фудбалска пирамида, беше длабоко, а Сити играше со извонредна напаѓачка финеса под негово водство.

За време на неговата деценија во клубот, Пеп стана и жител на Манчестер преку посвојување, што беше потврдено во летото 2025 година кога Универзитетот во Манчестер му додели почесен докторат за неговиот извонреден придонес во градот.

Клубот објави дека во наредните денови ќе се збогуваат со тренерот кој го трансформираше клубот и кој засекогаш ќе остане дел од семејството Манчестер Сити.

foto/ Depositphotos