Формула 1 ги враќа легендарните V8 мотори

Формула 1 ги враќа легендарните V8 мотори

пред 38 минути

Формула 1 подготвува голема промена во техничките правила за погонските единици. Челниците на тимовите потврдија дека е постигнат принципиелен договор со Меѓународната автомобилска федерација (ФИА) за враќање на V8 моторот од 2030 година, со што би завршил периодот на сегашната генерација на мотори.

Оваа промена би претставувала значаен пресврт бидејќи новите правила за моторите беа воведени дури на почетокот на 2026 година, по неколку години развој. Додека претходната генерација на погонски единици се користеше 12 сезони, од 2014 до 2025 година, сегашната би траела само четири сезони, до крајот на 2029 година, според новиот план.

Како што објави „RaceFans“, договорот сè уште не е официјално потпишан, но постои потребната поддршка меѓу производителите за промена на правилата една година порано од првично планираното.

Според информациите по последните разговори меѓу ФИА, челниците на тимовите и производителите на погонски единици, новиот концепт на мотор би можел да оживее веќе во 2030 година, иако конечниот договор сè уште не е официјално потврден.

Претставници на пет производители: Ауди, Ферари, Хонда, Мерцедес и Ред Бул-Форд, се сретнаа со раководителите на ФИА и Формула 1 за да разговараат за иднината на погонските единици.

Планот е да се заменат сегашните турбо V6 хибридни мотори, со 2,1-литарски турбополначи V8 единици и помал хибриден систем.

Формула 1 последен пат користеше атмосферски V8 мотори во 2013 година, пред да премине на сегашната ера на V6 турбо-хибридни мотори.

Една од најважните промени е поврзана со намалувањето на електричната моќност.

Според предлогот, хибридниот систем би имал 200 kW наместо сегашните 350 kW.

Од нив, 100 kW би биле достапни во сите услови, додека дополнителни 100 kW би служеле за помош на возачите при престигнување.

Целта е новите мотори да бидат поедноставни, поевтини и полесни за одржување, но и автомобилите да станат полесни и поагилни.

Биогоривата, односно целосно одржливите горива, би останале дел од формулата, додека турбополначот би овозможил задржување на модерната технологија што производителите сакаат да ја поврзат со развојот на патничките автомобили.

Сепак, конечните детали сè уште не се договорени.

Се очекува разговорите да продолжат во наредните недели, а официјалните информации би можеле да дојдат по следните состаноци на челниците.

Предложените промени наидоа на позитивни реакции кај возачите, кои долго време ги критикуваа сегашните погонски единици и начинот на кој тие управуваат со електричната енергија за време на трката.

Макс Ферстапен, четирикратниот светски шампион, е еден од најгласните критичари на сегашниот концепт.

Холанѓанецот го нарече предложеното враќање на V8 моторот добар избор за Формула 1.

„Тоа е комбинација од слушање на нашите совети, но и сфаќање дека она што го имаме во моментов не е она што го сакаме“, рече Ферстапен.

Сепак, неговиот личен избор би биле атмосферски мотори без турбополначи, што би произвело уште попрепознатлив звук.

Оскар Пјастри размислува слично.

„Многу сум возбуден. Одлично е што нè послушаа. Се надевам дека сè ќе биде поедноставно за навивачите, поевтино за производителите и подобро за нас возачите. Треба да биде победа за сите“, рече возачот на Мекларен.

За разлика од неговите помлади колеги, Фернандо Алонсо веројатно нема да биде дел од новата ера на V8.

Шпанецот дебитираше во Формула 1 во 2001 година, кога автомобилите беа напојувани од V10 мотори, а во 2006 година стана првиот шампион во ерата на V8, освојувајќи ја својата втора титула со Рено.

Иако неодамна го продолжи договорот до сезоната 2027, Алонсо не очекува да остане на патеката до 2030 година.

„Нема да бидам тука кога ќе се вратат V8 моторите. Тоа е сигурно. Далеку е и ќе биде доволно за мојата кариера. Фрустрирачки е што не ги задржавме во 2014 година. Оттогаш изгубивме 16-17 години чисто тркање“, рече Алонсо.

Враќањето на V8 моторот би можело да го означи почетокот на нова ера во Формула 1, со помала зависност од електрична енергија, полесни автомобили и звук што многу фанови го посакуваат со години.

Foto/ Depositphotos

Share
Scroll to Top