ЦСКА го „дотолчи“ Фенербахче, Барса поведе против Зенит

ЦСКА Москва се пласираше на фајнал фор турнирот во Евролигата, откако на гости со 85:68 доминираа кај Фенербахче за да ја комплетираат победата од 3:0 во четврт-финалната серија. Ова е деветти пласман во фајнал форот едноподруго за „Армејците“.

Фенер започна одлично со 12:0 водство, но ЦСКА бргу фати ритам и до крајот на првата четвртина ја намали предноста на само седум поени (24:17). Потоа следуваа две лоши четвртини на турскиот клуб, за во последните десет минути ЦСКА да има 71:50 предност.

Вил Клајбурн со 34 поени беше доминантен за ЦСКА, Ифе Лундберг додаде 22, додека Јоханес Воитман имаше 11, додека за Фенербахче, Нандо де Коло имаше 22 поени.

Блиску до фајнал форот е и Барселона, откако успеа да врати брејк со 78:70 победа на гости кај Зенит Санкт Петерсбург за 2:1 водство во серијата. Откако првите два меча меѓу тимовите беа драматични до самиот крај, овојпат Барселона имаше водство од десет поени (54:44) која ја заддржа до крајот. Најдобар на мечот беше Брендон Дејвис со 22 поени и осум скока, додека кај Зенит, Били Берон уфрли 19 поени.