Мекларен: Ќе користиме тимски наредби за наш возач да биде шампион

Мекларен е подготвен да го „искористи“ Оскар Пјастри за да му помогне на Ландо Норис да ја освои светската титула овој викенд на патеката „Јас Марина“ во Абу Даби, доколку Пјастри се најде во ситуација повеќе да не е во конкуренција да стане шампион.

Во Мекларен велат дека борбата меѓу возачите била дозволена во текот на целата сезона, дека и на Ландо Норис и на Оскар Пјастри им била дадена најдобра можна шанса да ја освојат титулата.

Пред последната трка, ситуацијата е таква што Норис има 16 поени предност пред Пјастри, меѓу нив е и бранителот на титулата Макс Ферстапен, кој е 12 поени зад Норис.

„Додека двајцата возачи имаат шанса да бидат шампиони, ќе направиме сè како порано – тие имаат слобода да се тркаат. Доколку работите се развијат за време на трката така што ќе стане јасно дека само еден од нив може да биде шампион, ќе направиме сè за нашиот возач да ја освои титулата“, рече Зек Браун, извршниот директор на Мекларен.

„Ќе се водиме со здрав разум, нема да ја отфрлиме можноста нашиот возач да биде шампион поради петтото или шестото место или кое било место, ако се случи еден од возачите да остане без шанса“, додаде тој.

А ситуациите во кои од Пјастри би можело да се побара да се откаже од позицијата за Ферстапен да не биде шампион се многубројни.

Најочигледното сценарио е секако она во кое Ферстапен победува, Пјастри е втор или трет, а Норис е четврти. Во таа ситуација, Норис треба да заврши трет за да биде шампион. Сега е сосема јасно дека во тој случај Мекларен би му наредил на Пјастри да му ја препушти позицијата на Норис.

Браун вели дека Пјастри би прифатил тимска наредба:

„Нашите возачи отсекогаш ги почитувале желбите на тимот, како што ние ги почитуваме нивните желби. Не се сомневам дека доколку треба нашите возачи ќе работат во најдобар интерес на тимот.“

Ако го прашате Ландо Норис – тоа е непристојно прашање и тој самиот „никогаш не би побарал такво нешто“.

Инаку Норис доминираше на првите два слободни тренинзи, пред Ферстапен, додека Пајстри возеше само на вториот (првиот тренинг во неговиот болид го возеше Пато О’Ворд) и заврши на 11-то место.

Првите два тренинга покажаа дека Икс-фактор може да биде Џорџ Расел во Мерцедес, кој беше шестти и трети. На вториот тренинг беше за само 16 илјадити делови од секудата побавен од Ферстален.