Откриен скандал со СП во 1998 година – Биле забранети допинг контроли врз француските репрезентативци

Поранешната француска министерка за спорт, Мари-Жорж Бафет, во нов документарец за Зинедин Зидан призна дека ѝ било наредено да ги прекине контролите за допинг врз националниот тим пред Светското првенство во 1998 година. Целта била да не се вознемирува тимот до крајот на турнирот, пишува „Газета дело Спорт“.

Нејзиното признание, емитувано во документарецот „Зидан, фабрика на легенди“ на француската телевизија BFMTV, е во целосна спротивност со нејзиното сведочење од 2013 година.

Во тоа време, таа изјави под заклетва пред сенатскиот комитет: „Никогаш не дадовме никакви инструкции во таа смисла“.

Бафет сега потврди дека нејзините канцеларии ги прекинале ненајавените проверки врз Зидан и остатокот од тимот.

Наредба од кабинетот на премиерот

Новата изјава се однесува на настаните од 1997 година, кога беше спроведена ненајавена контрола на допинг врз членовите на францускиот национален тим за време на подготовките во Тињес.

Тестирањето предизвика силни реакции од играчите, селекторот Еме Жаке и фудбалската асоцијација, веруваа дека тоа ги нарушува подготовките, иако сите тестови за урина беа негативни. Во тоа време, Бафет беше министер во владата на премиерот Лионел Жоспен (1997-2002).

Во документарецот се појавува и Ален Гарние, поранешен лекар кој бил испратен во Тињес од Министерството за спорт. Тој открива дека министерот му ја дал наредбата исклучиво усно.

„Не ми беше дозволено да го вознемирувам националниот тим до Светското првенство. Со други зборови, немаше повеќе ненајавени контроли“, рече Гарние.

Бафет сега ја потврди својата верзија. „По Светското првенство, ја продолживме борбата против допингот“, рече таа и додаде дека „инструкцијата веројатно дошла од ниво на министерски канцеларии“.

Гарние тврди дека наредбата дошла директно од Матињон, седиштето на кабинетот на премиерот. Со своето ново признание, Мари-Жорж Бафет ја поби официјалната верзија за која се залагала повеќе од петнаесет години, вклучително и пред државните институции. Во тоа време, таа јавно изјави дека е под „секаков вид притисоци“.

Франција го освои златниот медал на гореспоменатото Светско првенство победувајќи го Бразил во финалето.