Потврдени новите правила за Светското првенство – „Законот на Винисиус“, ВАР судиите добија поголеми овластувања

Меѓународниот одбор на фудбалски асоцијации (ИФАБ) усвои серија значајни промени во правилата на играта што ќе бидат имплементирани на претстојното Светско првенство. Новитетите вклучуваат проширени овластувања на ВАР технологијата, построги казни за недолично однесување на играчите и цел сет мерки насочени кон намалување на непотребното губење на времето.

Целта на промените е да се зголеми ефективното време за играње, побрзо донесување одлуки и подобра контрола на однесувањето на актерите на теренот, а новите правила треба да стапат во сила од сезоната 2026/27.

Судиите во ВАР собата ќе можат да интервенираат во уште три ситуации кои досега не беа опфатени со протоколот. Ќе им се даде право да реагираат во случаи на погрешно доделен втор жолт картон, погрешен идентитет на казнет играч, како и во случаи на очигледно погрешно доделени корнери.

Исто така, ВАР-от, ќе може да посочи фаули што претходеле на прекинот, како што е блокирање на одбранбен играч непосредно пред изведување на корнер. Доколку се утврди дека е направен прекршок, главниот судија ќе го прегледа видеото и ќе донесе конечна одлука за дисциплинската мерка и евентуалното повторување на прекинот.

ИФАБ нагласува дека овластувањата кај корнерите ќе се користат исклучиво за исправување на очигледните грешки и дека тие не смеат да го забават текот на играта.

Законот на Винисиус

Една од највпечатливите новини се однесува на однесувањето на играчите.

Фудбалери кои ги покриваат устите со рака, маица или други средства за време на дискусијата со противникот или судијата за да ги сокријат изговорените зборови, ќе бидат казнети со директен црвен картон.

Правилото, кое некои медиуми веќе го нарекоа „Законот на Винисиус“, има за цел борба против расистичките и другите навредливи пораки на теренот. Од друга страна, правилото нема да важи за играчи кои разговараат на ист начин во неформални ситуации со противнички фудбалери.

Играчите кои доброволно го напуштаат теренот во знак на протест против одлуката на судијата, исто така, ќе бидат казнети со директно исклучување.

Доколку тимот предизвика прекин на играта на овој начин, натпреварот ќе биде регистриран со службен резултат во корист на противникот. Истата санкција е предвидена и за клупските службеници кои ги охрабруваат играчите да го сторат тоа.

Без одложување

Во обид да се зголеми ефективното време на игра, ИФАБ воведе и голем број нови мерки против „крадењето на времето“.

Играч кој ја напушта играта за време на замена ќе мора да го напушти теренот во рок од десет секунди, користејќи ја најблиската точка на аут линијата. Во спротивно, неговата замена нема да може да влезе во играта до следниот прекин, а ќе мора да помине најмалку една минута од моментот кога играчот ќе излезе.

Судиите ќе користат јавно одбројување од пет секунди кога се изведува аут или гол аут. Доколку тимот не изведе аут во предвиденото време, топката ќе му биде доделена на противникот. Во случај на одложување на гол аутот, на противничкиот тим ќе му биде доделен корнер.

Играчите кои добиваат медицинска помош на теренот, со исклучок на голмани, повреди на главата и судири меѓу повеќе играчи, ќе бидат обврзани да останат надвор од теренот најмалку една минута.

Крај на тактичките тајм-аути

ФИФА е решена да ја запре практиката на користење на повредите, особено на голманите, како можност за неформални тактички договори со тренерите.

Главниот судија на ФИФА, Пјерлуиџи Колина, изјави дека судиите нема да им дозволат на играчите да одат на клупата за време на паузата за тактички инструкции.

„Кога голманот е повреден, играчите немаат право да ги користат таквите ситуации како можност за тајм-аут и разговор со тренерот“, рече Колина.

Тој додаде дека играчите и тренерите веќе се предупредени дека ваквите ситуации ќе бидат внимателно следени.

Во друга иновација, сите натпревари на Светското првенство во 2026 година ќе имаат задолжителна пауза од три минути за освежување во секое полувреме.

Судиите ќе имаат слобода да го одредат најсоодветниот момент за прекин во зависност од текот на играта и другите околности на теренот.

Foto/ EPA