УЕФА подготвува кривична пријава против Инфантино

Европската фудбалска унија (УЕФА) подготвува кривична пријава против претседателот на ФИФА, Џани Инфантино, пред швајцарските судови.

УЕФА подготвува кривична пријава против Инфантино поради сомнение за можна финансиска злоупотреба во врска со планот што требаше да и донесе милијарди долари на светската фудбалска организација.

УЕФА веќе покрена правни чекори во Соединетите Американски Држави, барајќи од судовите во Њујорк и Флорида да дозволат стекнување на потенцијално важни докази поврзани со сега неуспешниот план на ФИФА.

Во исто време, УЕФА побара од судот во Јужна Флорида дозвола за добивање докази како дел од странски случај против ФИФА, чие седиште за деловни операции во САД е во Корал Гејблс, во близина на Мајами.

Во сржта на спорот е план според кој „Трајв Капитал“ требаше да биде еден од водечките инвеститори во проектот вреден 4,2 милијарди долари.

Идејата беше приватните инвеститори да добијат 20 проценти од акциите во комерцијалната подружница на ФИФА, која ќе управува со комерцијалните права и настани на светската фудбалска организација, вклучувајќи го и Светското првенство.

Сепак, Инфантино го напушти планот на 1 август, по силното противење од светските фудбалски лидери, вклучително и УЕФА.

Европската фудбалска унија сега тврди дека постојат основи за понатамошни правни дејствија.

Во документот, проценетата вредност на трансакцијата е особено проблематична.

Според УЕФА, цената од 4,2 милијарди долари можеби била „измамнички одредена“ и не мора да одговара на пазарната вредност на имотот, при што Инфантино го промовирал таквиот аранжман за своја корист.

Адвокатите на УЕФА наведуваат дека според условите што ги презентирал Инфантино, инвеститорите би добиле траен финансиски интерес во комерцијалниот огранок на ФИФА, додека целата компанија би била проценета на околу 20 милијарди долари.

„Таа бројка не била резултат на отворено и конкурентно наддавање, ниту пак била проценета од некој независен проценител“, се наведува во документот.

УЕФА понатаму тврди дека таков аранжман би им овозможил на Инфантино и „мал круг луѓе“ да стекнат траен интерес во еден од највредните средства на ФИФА, што, според европската организација, би било на штета на ФИФА, нејзините членови и другите играчи во фудбалот.

Foto/ Depositphotos