(Видео) Трамп му врачи на Маск медал за наука: „Тој е нашиот современ Томас Едисон“

Американскиот претседател, Доналд Трамп, вчера му го врачи престижниот Национален медал за наука на директорот на „SpaceX“, Илон Маск, на свеченост одржана во Институтот за мир во Вашингтон. Покрај Маск, признанија добија и неколку други лидери од технолошкиот сектор: коосновачот на „Google“, Сергеј Брин, директорот на „Nvidia“, Џенсен Хуанг, и шефицата на „AMD“, Лиса Су, пренесува „Euronews“.

„Сакам да им се заблагодарам на сите што се тука додека ги славиме возбудливите достигнувања во науката и технологијата во златното доба на Америка“, рече Трамп во своето воведно обраќање.

Потоа, тој посебно се осврна на Маск, нарекувајќи го индустриски титан и „современ Томас Едисон“.

Elon Musk received the National Medal of Science from Trump, the top U.S. honor for scientific and technological achievement.

https://t.co/WXzptOuscN

— Open Source Intel (@Osint613) October 8, 2026

„Малкумина Американци во историјата направиле повеќе за националните интереси на Америка од Илон, и тоа во различни области. Неговиот гениј и решителност ја претворија научната фантастика во реалност“, изјави Трамп. Претседателот додаде: „Илон, честитки. Пријатели сме и сè тоа, но ти си навистина посебен човек. Ти благодарам многу и честитки“.

И покрај пофалбите на свеченоста, Трамп и Маск имаа прилично нестабилен однос во последните години. Маск му се придружи на Трамп во подоцнежните фази од неговата претседателска кампања, а по враќањето на Трамп во Белата куќа во јануари 2025 година, тој ја презеде истакнатата улога на шеф на Одделот за владина ефикасност (DOGE).

На таа позиција, тој ја предводеше иницијативата за значително поголема штедливост на државната администрација. Сепак, нивниот однос се влоши откако Маск го критикуваше предлог-законот на Трамп за буџетски расходи, познат како „Еден голем, прекрасен закон“ (One Big Beautiful Bill). Ова поттикна жесток и јавен конфликт меѓу нив двајцата.

Сепак, во последните недели, Маск се врати во најтесниот круг соработници на Трамп. Шефот на „Тесла“ треба да стане ко-лидер на проектот „Меридијан“, кој беше покренат на барање на Министерството за одбрана. Проектот ќе се занимава со проучување на иднината на војувањето.

Trump is doing tricks on that thing: "Elon is our modern day Thomas Edison" https://t.co/hB27r1N078

— Aaron Rupar (@atrupar) October 8, 2026

Неговата цел е да се идентификуваат оружјата и технологиите што американската војска ќе треба да ги развие и совлада. Проектот исто така треба да предложи конкретни решенија за нивниот развој, тестирање и примена на терен.

Во соопштението на Белата куќа се наведува дека Маск го добил Националниот медал за наука за инженерски достигнувања со исклучителна амбиција и обем, кои ги поместиле границите на истражувањето на вселената, интелигентните системи и комуникациите. Во образложението се додава дека „со тоа е вратено американското технолошко лидерство и е отворено ново поглавје во американското производство“.

фото/ЕПА

Текстот (Видео) Трамп му врачи на Маск медал за наука: „Тој е нашиот современ Томас Едисон“ е превземен од МАКФАКС.