Вучиќ гневен поради одлука на „Твитер“: Eдвај чекам да ме укинат како Трамп

На листата на српски медиуми кои „Твитер“ ги означи како провладини е додаден уште еден јавен медиумски сервис од Србија – Радио телевизија Војводина.

Претседателот на Србија, Александар Вучиќ, го обвини „Твитер“ за цензура и запраша зошто не е во ред споменатите медиуми да соработуваат со владата.

Српското Министерство за култура, пак, посочи дека е изненадено од постапката на „Твитер“ и наведе дека одлуката е спротивна на принципите и целта на таа мрежа, пишува Н1.

РТВ е единаесеттиот медиум во Србија што „Твитер“ нема да им го препорачува на своите корисници, односно ќе ги предупредува за неговата блискот со Владата.

Председник: Приштина захтевима за признање одрешила руке Србији; Избеглице из Авганистана не траже да дођу у Србију https://t.co/oKkYiNWekV

— RTV (@RTVojvodine) August 19, 2021

Ваквите страници се означени како медиуми во кој српската влада ја контролира уредувачката политика преку финансирање, директен или индиректен политички притисок.

Српскиот претседател не гледа што е спорно за „Твитер“.

„Па со кого ќе соработуваат? Тајкуни, криминалци и крадци? Најнормално е тие да соработуваат со владата. Ние како држава на повеќето од тие медиуми не им плаќаме. Платени се ‘Гласот на Америка’, ‘Би -би -си’, а не се ставени на листите за владини медиуми. Ова води кон друго прашање – кој е вистинскиот цензор. Едвај чекам да ме исклучат, да бидам уште еден Трамп во светот“, рече Вучиќ.

Сепак ваквото исклучување на Вучиќ од „Твитер“ досега никој не го најавил, а на тековната одлука на мрежата засега најжестоко реагираше „Информер“ на својата насловна страница. Меѓутоа, пред само шест месеци, главниот и одговорен уредник на „Информер“ го кажа она што сега го наведува и „Твитер“.

„Мојот ‘Информер’ е провладин медиум, по мој избор, не дека некој така ми наредил или платил, туку по мој избор. Па, се разбира дека ќе ја поддржам политиката на оваа влада и оваа држава“, изјави Драган Ј. Вучичевиќ на 13 февруари.