Инцидент со мина и хаубица на границата: Растечки тензии меѓу Северна и Јужна Кореја

Тензиите меѓу Северна и Јужна Кореја се зголемија оваа недела, по писмото испратено од Пјонгјанг до Советот за безбедност на ОН – во кое се повторуваат обвинувањата дека Сеул го исценирал инцидентот со нагазна мина во септември – како и по забележувањето на севернокорејска хаубица во близина на границата.

Хаубица во близина на границата
Присуството на самоодна хаубица од 122 мм во близина на границата, за што вчера извести новинската агенција „Јонхап“, претставува редок случај ваков вид артилерија да биде распоредена на толку видливо место.

„Многу е невообичаено за Северна Кореја толку отворено да ја прикажува својата самоодна артилерија“, изјави Лим Еул-чул, професор на Универзитетот „Кјунгнам“ во Сеул.

„Со тоа што намерно го истакнува ова оружје, Северна Кореја испраќа сигнал – преку дела, а не преку зборови – дека има намера да ја спроведува својата гранична политика преку сила, наместо преку дијалог или преговори.“

Ова, исто така, служи како предупредување до Јужна Кореја да биде претпазлива за да се избегне ескалација на тензиите на границата, со цел да се спречи случаен конфликт, додаде тој.

Писмо до Советот за безбедност на ОН
Севернокорејскиот државен медиум КЦНА објави дека претставникот на земјата во ОН, во писмо испратено во неделата, навел оти Сеул го користи инцидентот со нагазната мина за да ги претстави градежните работи што ги изведува Пјонгјанг на границата како воен упад. Во писмото, Северна Кореја предупредува дека повредата на нејзиниот суверенитет може да предизвика мерки за самоодбрана и дека Јужна Кореја ќе сноси „целосна одговорност за сите последици што би произлегле од тоа“.

Ова писмо е одговор на дописот што Јужна Кореја минатата недела го испрати до Советот за безбедност, во кој се тврди дека експлозијата од 21 септември во Демилитаризираната зона била предизвикана од севернокорејски сили кои поставиле мина, што претставува кршење на Договорот за примирје од Корејската војна.

Командата на ОН, која ја надгледува Демилитаризираната зона, соопшти дека севернокорејска мина, поставена од другата страна на линијата, го прекршила примирјето. Пјонгјанг ја негира одговорноста.

Реакцијата на Сеул
Портпарол на јужнокорејското Министерство за обединување во понеделникот изјави дека писмото од Северна Кореја, се чини, го повторува постоечкиот став на Северот и се обидува да ги оправда неговите, таканаречени, активности за обележување на граничната линија.

Сеул предложи дијалог со Северна Кореја со цел да се намалат тензиите на границата.

Текстот Инцидент со мина и хаубица на границата: Растечки тензии меѓу Северна и Јужна Кореја е превземен од МАКФАКС.