Медиуми: НАТО го намалува фондот за воена помош за Украина

НАТО го преиспитува обемот на финансиска помош за Украина поради ставот на Соединетите Американски Држави, јавуваат медиумите.

Како што се истакнува, на претстојниот самит на Алијансата во Анкара, кој ќе се одржи на 7 и 8 јули, новите средства за воена помош за Киев би можеле да изнесуваат од 10 до 12 милијарди долари, наместо претходно планираните 40 милијарди долари.

Извори од седиштето на НАТО во Брисел наведуваат дека, додека Виктор Орбан беше на власт во Унгарија, Будимпешта го блокираше доделувањето на 90 милијарди евра од Европската Унија, од кои поголемиот дел беше наменет за воените потреби на Украина.

Бидејќи тој пакет сега е деблокиран, финансискиот товар треба да го сносат земјите кои истовремено се членки на Европската Унија и НАТО.

„Бидејќи американската помош за Украина е значително намалена, како и подготвеноста на Вашингтон да продолжи да го поддржува Киев, новите средства не треба да надминуваат 10 до 12 милијарди долари“, според неименувани извори од НАТО.

Ова значи дека вкупниот обем на помош за Украина би останал на ниво од околу 70 милијарди долари, но само 10 милијарди би претставувале нови финансиски обврски, наместо претходно планираните 40 милијарди долари.

Претходно, медиумите објавија дека одлуката за дополнително финансирање на воената помош за Украина би можела да биде вклучена во финалниот документ на самитот на НАТО во Анкара.

Се наведува дека иницијативата доаѓа од Германија, додека учеството на Соединетите Американски Држави сè уште не е сигурно, пренесува Спутник.

Од вкупниот пакет на Европската Унија од 90 милијарди евра, околу 30 милијарди евра се наменети за Украина, но, според весникот, сега се прави нова пресметка на финансиските обврски.

Текстот Медиуми: НАТО го намалува фондот за воена помош за Украина е превземен од МАКФАКС.