Нетанјаху пристигнува во Вашингтон; Трамп: Доаѓа Биби, имаме големи состаноци

Израелскиот премиер Бенјамин Нетанјаху в понеделник треба да почне разговори за посредување во втората фаза од прекинот на огнот со Хамас, соопшти неговиот кабинет, додека тој е во посета на новата администрација на Трамп во Вашингтон.

Пред заминувањето Нетанјаху им рече на новинарите дека ќе разговара за победување на Хамас, за конфликтот со Иран и за ослободување на сите заложници на средбата со претседателот Доналд Трамп во вторник.

Тоа ќе биде прва средба на Трамп со странски лидер по враќањето во Белата куќа во јануари.

„Мислам дека тоа е доказ за силата на израелско-американскиот сојуз“, рече Нетанјаху пред да се качи на летот.

Израелскиот амбасадор во ОН, Дени Данон, му посака добредојде во главниот град на САД во неделата вечерта. Данон рече дека средбата меѓу Трамп и Нетанјаху ќе го зајакне „длабокиот сојуз меѓу Израел и САД и ќе ја унапреди соработката“.

Трамп, кој ја презеде заслугата за договорот за прекин на огнот по 15 месеци војна, во неделата рече дека преговорите со Израел и другите земји на Блискиот Исток напредуваат.

„Биби (Бенјамин) Нетанјаху доаѓа во вторник и мислам дека имаме закажани многу големи состаноци“, рече Трамп.

Кабинетот на Нетанјаху соопшти дека израелскиот премиер в понеделник ќе почне разговори со пратеникот на Трамп за Блискиот Исток, Стив Виткоф, за условите од втората фаза од прекинот на огнот.

Текстот Нетанјаху пристигнува во Вашингтон; Трамп: Доаѓа Биби, имаме големи состаноци е превземен од МАКФАКС.