Полскиот министер за надворешни работи: Русија подготвува нови саботажи во Европа

Полскиот министер за надворешни работи Радослав Сикорски изјави дека западните земји имаат, како што тврди, веродостојни разузнавачки информации дека Русија подготвува нови саботажни акти во Европа.

Сикорски изјави дека целта на јавното презентирање на овие предупредувања е да се одврати Москва од наводни провокации и да се спречи нивното спроведување.

„Денес мора да ни верувате – не само мене, туку и на другите земји – дека имаме веродостојни информации дека Русите повторно планираат нешто, а целта на овие предупредувања е да ги обесхрабрат да ги спроведат овие провокации“, рече Сикорски.

Шефот на полската дипломатија не даде конкретни докази или детали за наводните планови, но тврдеше дека западните разузнавачки служби имаат сигурни информации што ги поддржуваат таквите проценки.

Според него, Русија веќе води „хибридна и кинетичка војна“ против Полска и Франција, додека не прецизираше за кои конкретни активности се однесува ова тврдење.

Москва постојано ги отфрла обвинувањата од европските претставници за подготовка на саботажи и хибридни напади, оценувајќи ги како дел од поширока кампања насочена кон претставување на Русија како постојана закана за европската безбедност.

Заменик-претседателот на Советот на Федерацијата, Константин Косачев, претходно изјави дека европските политичари дале „лажна дијагноза“ за наводната руска закана и дека не разбираат дека, според него, Русија не е причина, туку можен дел од решението за бројни меѓународни проблеми.

Текстот Полскиот министер за надворешни работи: Русија подготвува нови саботажи во Европа е превземен од МАКФАКС.