Продажбата на недвижности во Дубаи нагло опадна: „Продаваме со попуст од 20 до 25 проценти“

Продажбата на недвижности во Дубаи драстично опадна, изјави водечки аналитичар на пазарот, откако војната на Блискиот Исток предизвика нагло забавување на еден од најскапите пазари на недвижности во светот.

Продажбата во градот падна за 19 проценти во мај во однос на претходниот месец, забрзувајќи се од падот од 4 проценти во април, според истражувањето на ValuStrat. Бројот на трансакции сега е помалку од половина од нивото забележано во истиот период минатата година, се вели во анализата.

„Пазарот на готови недвижности не доживеал годишен пад од ваков обем од пандемијата“, рече Хајдер Туаима, раководител на истражувањето на недвижности во ValuStrat, консултантска компанија со седиште во Дубаи која го следи пазарот од 2014 година.

Луѓето беа привлечени од политиката на нулти данок на доход
Деловна анализа од истражувачката фирма „Ридин“ покажа дека продажбата на недвижности во мај вредела 22,5 милијарди дирхами (6,1 милијарда долари), што е намалување од 42 проценти во однос на април. Тоа е околу половина од 46,6 милијарди дирхами регистрирани во месецот пред почетокот на конфликтот, според податоците првично објавени од „Блумберг“.

Дубаи, кој се наоѓа на источната страна од Арапскиот Полуостров, во последните години доживеа силен бум на недвижности, поттикнат од приливот на луѓе со високи приходи привлечени од политиката на нулти данок на доход, објавува „Гардијан“.

Но, избувнувањето на војната на Блискиот Исток кон крајот на февруари го потресе пазарот, а во март иранска ракета погоди луксузен хотел во познатата област Палм Џумеира во Дубаи. Останува нејасно колку брзо пазарот би можел да се опорави ако се одржи мировниот договор меѓу САД и Иран.

„Во март имаше огромна паника“
Продавачите на луксузни вили и станови во градот веќе ги намалија бараните цени за десетици милиони фунти, според агентите за недвижности.

Јасин Валимула, агент во Дубаи, специјализиран за недвижности вредни најмалку 10 милиони долари (7,5 милиони фунти), рече дека ретките преостанати продажби сега се завршуваат со попусти од 20 до 25 проценти од вредностите пред конфликтот.

„Во последната година и пол, продадовме имоти на супер богати клиенти, од кои сите сега го напуштија Дубаи. Во март имаше голема паника и ситуацијата е сè уште нејасна денес. Купувачите од Западна Европа сега се повнимателни. Мислам дека ќе почекаат една година, можеби две, во зависност од тоа како ќе се развива ситуацијата“, предвидува Валимула.

„Пазарот се коригира“
Ова претставува голем пресврт за Дубаи, кој минатата година беше најактивниот град во светот за луксузни недвижности. Меѓународната агенција Најт Френк откри дека до крајот на 2025 година, во Дубаи се продадени повеќе недвижности во вредност помеѓу 2,5 милиони и 10 милиони долари отколку во кој било друг град во светот, пред Лондон, Њујорк, Лос Анџелес и Хонг Конг.

Во сегментот над 10 милиони долари, Дубаи забележа 9.050 продажби, во споредба со 6.577 во Њујорк и 3.089 во Лондон. Но, пазарот сега се коригира, рече Валимула.

„Бројките беа екстремно високи на почетокот, особено во последните две години. Тоа ниво на пазарот во секој случај не беше одржливо. Ќе има корекција на цените, само сè уште не знаеме какво ќе биде влијанието додека не добиеме геополитичка јасност“, рече тој.

Свртување кон други глобални центри
Во меѓувреме, номадска група супербогати се свртува кон други глобални центри, како што се Милано, Лондон и Сингапур.

Ричард Вејнд од групата за недвижности Cencorp додаде дека многу брокери на некогаш просперитетниот пазар во Дубаи ќе бидат принудени да затворат.

„Војната беше огромен и брзо движечки настан. Падот на продажбата врши притисок врз помалите агенции кои се појавија на прегреан пазар. Пред десет години имаше околу 1.000 брокери, сега има околу 10.000. Тој број ќе се намали“, рече тој.

Текстот Продажбата на недвижности во Дубаи нагло опадна: „Продаваме со попуст од 20 до 25 проценти“ е превземен од МАКФАКС.