Рекордни 2,5 милиони луѓе на мисата на Папата во Буенос Аирес

Повеќе од два и пол милиони луѓе се собраа денес на миса на отворено, која ја служеше папата Лав XIV во Буенос Аирес, што претставува најголем настан во текот на неговиот 18-месечен понтификат, соопшти Ватикан.

Првиот папа од американскиот континент моментално е на турнеја низ три јужноамерикански земји, која ќе заврши на 17 ноември. Претходниот најголем собир се случи во јуни, кога околу 1,2 милиони луѓе излегоа на улиците во Мадрид за време на посетата на Папата на Шпанија.

Во Буенос Аирес, верниците се собраа долж неколку километри од авенијата „Авенида дел Либертадор“, веејќи бело-жолти знамиња. Извици „Да живее папата Лав!“ одекнуваа низ улиците додека 71-годишниот поглавар на Католичката црква се возеше во „папамобил“ без покрив.

Луѓето почнаа да се собираат уште во раните утрински часови, а полицијата воспостави безбедносна зона, поради што некои делови од градот, кои вообичаено се многу прометни, останаа речиси целосно празни.

Помалку од еден месец по операцијата за отстранување на рак на белите дробови, Лав XIV посетува три јужноамерикански земји, при што се планирани дури 50 настани.

По посетата на Уругвај, тој вчера пристигна во Аргентина – земја која не била посетена од поглавар на Католичката црква уште од 1987 година. Во среда тој ќе отпатува за Перу, а на 17 ноември ќе се врати во Рим.

Папата вчера му се обрати на аргентинскиот претседател Хавиер Милеи, либертаријанец и близок сојузник на американскиот претседател Доналд Трамп, повикувајќи го да се погрижи неговите политики на штедење да не ги загрозат најсиромашните жители на земјата.

Католичката црква остро ги критикуваше мерките за штедење на Милеи, особено кратењата во социјалните услуги.

Папата, исто така, го предупреди Милеи, познат по своите остри и провокативни изјави, дека политичките лидери мора внимателно да ги избираат зборовите и да бидат свесни за границите на својата моќ.

 

фото/ЕПА

Текстот Рекордни 2,5 милиони луѓе на мисата на Папата во Буенос Аирес е превземен од МАКФАКС.